ოკუპირებული აფხაზეთის საგარეო საქმეთა მინისტრი ვიაჩესლავ ჩირიკბა ევროკავშირის დელეგაციის წარმომადგენლებს შეხვდა.
დელეგაციის შემადგენლობაში ევროკავშირის საოპერაციო განყოფილების უფროსი სამხრეთ კავკასიასა და საქართველოში კაიდო სირელი და პროექტების მენეჯერი კატოლინ სტამპფერ-ალისულტანოვა იყვნენ.
აფხაზური მხრიდან, ჩირიკბას გარდა, შეხევდრას მისი მოადგილე ქაან ტანიაც ესწრებოდა.
შეხვედრაზე სტუმრებმა და მასპინძლებმა ევროკავშირის მიერ აფხაზეთში განსახორციელებელი პროექტები განიხილეს.
კაიდო სირელმა ოკუპირებული აფხაზეთის საგარეო უწყების ხელმძღვანელს ევროკავშირის იმ პროექტების შესახებ მოახსენა, რომელიც ოკუპირებული აფხაზეთის ტერიტორიაზე წარმატებით მიმდინარეობს და რომელიც ენგურის ჰიდროელექტროსადგურის რემონტსა და გალის რაიონში სოფლის მეურნეობის განვითარებას ეხება.
სირელმა აღნიშნა ისიც, რომ ამჟამად მათი მისია იმ სფეროებს არჩევს, სადაც ევროკავშირმა სამომავლო პროექტების განხორციელება უნდა დაიწყოს.
დელეგაციის წევრებმა მზადყოფნა გამოთქვეს, გაიზარდოს იმ პროექტების რიცხვი, რომლებიც აფხაზეთის სხვა რაიონების ეკონომიკურ განვითარებასაც შეუწყობს ხელს.
თავის მხრივ, აფხაზმა ოფიციალურმა პირებმა ევროპელ სტუმრებს ურჩიეს, განსაკუთრებული ყურადღება ტყვარჩელის და ოჩამჩირის რაიონებს დაუთმონ, ვინაიდან ამ რაიონების ინფრასტრუქტურა ყველაზე მეტად საჭიროებს აღდგენა-განახლებას.
ჩირიკბამ აღნიშნა ასევე, რომ რესპუბლიკაში აუცილებელია ჯანდაცვისა და სოციალური ინფრასტრუქტურის განვითარების პროექტების განხორციელება.
