მოვუწოდებ ყველას, დიდი სიფრთხილით მოეკიდონ ისეთ საკითხებს, რომელიც შეეხება ქვეყნის უსაფრთხოებას, ეროვნულ ინტერესებს, ქართველი ხალხის ევროპულ არჩევანს და მათ პერსპექტივებს,-განაცხადა საქართველოს პრემიერ-მინისტრმა ირაკლი ღარიბაშვილმა საგანგებოდ გამართულ ბრიფინგზე.
მისი თქმით, 2012 წელს ხალხმა ნდობის მანდატი კოალიცია "ბიძინა ივანიშვილი - ქართულ ოცნებას" სწორედ გაცხადებული ევროპული კურსისა და ღირებულებების გამო მისცა.
„2012 წელს ხალხმა ნდობის მანდატი მისცა კოალიცია "ბიძინა ივნიშვილი - ქართულ ოცნებას" სწორედ ჩვენს მიერ გაცხადებული კურსის და ღირებულებების გამო. ეს არცერთი ცალკე აღებული პოლიტიკოსის და პოლიტიკური გუნდის დამსახურება არ იყო და ვერავინ შეძლებს ამ ნდობის გამოყენებას საკუთარი პოლიტიკური ქულებისთვის,"-განაცხადა ირაკლი ღარიბაშვილმა.
საქართველოს მთავრობის მეთაური პარტია „თავისუფალი დემოკრატების" წევრების მიერ გაკეთებულ განცხადებებს გამოეხმაურა და კიდევ ერთხელ ხაზგასმით აღნიშნა, რომ ქვეყნის პოლიტიკური კურსი უცვლელია.
„საქართველოს მთავრობა განუხრელად ადგას ევროპულ და ევროატლანტიკურ კურსს, ეს კურსი არის ურყევი, ამ კურსიდან გადახვევა გამორიცხულია. ეს არის ჩვენი ხალხის არჩევანი და ურყევი ნება. ვერავინ მოახერხებს საკუთარ თავზე მიიწეროს ჩვენი ქვეყნის ევროპული ორიენტაცია. ხალხის არჩევანით სპეკულირება ყოვლად გაუმართლებელი და მიუღებელია,"-განმარტა პრემიერმა.
მისივე განცხადებით, „თავისუფალი დემოკრატების" მხრიდან გაკეთებული განცხადებები საფრთხეს უქმნის ქართულ სახელმწიფოს და მის ევროპულ არჩევანს.
„საზოგადოებისთვის ნათელი უნდა იყოს, რომ განცხადებებს აკეთებენ ერთი პოლიტიკური პარტიის წევრები-„თავისუფალი დემოკრატები". ისინი არჩევანს აკეთებენ პიროვნებასა და სახელმწიფოს შორის და სოლიდარობას უცხადებენ ერთმანეთს. თუმცა გამოძიების პროცესის შეფერხება პოლიტიკური სარჩულით დაუშვებელია. ამ ვითარებაში პოლიტიკოსებისა და მაღალი თანამდებობის პირების მხრიდან გაკეთებული სრულიად უპასუხისმგებლო განცხადებები და თანამდებობების დემონსტრაციულად დატოვება ატარებს საბოტაჟის ნიშნებს და აზიანებს სახელმწიფოს ინტერესებს,"-აღნიშნა ირაკლი ღარიბაშვილმა.
პრემიერ-მინისტრის თქმით, დღეს ქართული სახელმწიფო არის ძლიერი, რომლის ინსტიტუტები მუშაობენ გამართულად და არ დაუშვებს, რომ ქვეყნის ინტერესებს ზიანი მიადგეს.
