ქვეყანა კარგავს სატრანზიტო პოტენციალს და ასევე კარგავს პოტენციალს იქცეს რეგიონულ ჰაბად, აღნიშნულის შესახებ განცხადებას "ერთიან ნაციონალურ მოძრაობაში" მსოფლიო ბანკის ლოჯისტიკის ინდექსში (Logistics Performance Index, LPI) საქართველოს პოზიციების გაუარესების შეფასებისას აკეთებენ. როგორც პარტიის მიერ გავრცელებულ განცხადებაშია აღნიშნული, მსოფლიო ბანკი პერიოდულად ზომავს და აქვეყნებს 160 ქვეყნის ლოჯისტიკურ ინდექსებს, ე.წ. Logistics Performance Index, LPI-ს. ეს ინდექსი/რეიტინგი ძალიან მნიშვნელოვანია სატრანზიტო და/ან რეგიონული ჰაბის ამბიციის მქონე ნებისმიერი ქვეყნისათვის.
"2007 წელს, როდესაც მსოფლიო ბანკმა პირველად გამოაქვეყნა აღნიშნული ინდექსი, საქართველო საერთოდ ვერ მოხვდა ქვეყნების ჩამონათვალში. გატარებული რეფორმების შედეგად, 2010 წელს საქართველომ დაიკავა 93-ე ადგილი, ხოლო 2012 წელს - 77-ე ადგილი.
2014 წელს შეინიშნება მსოფლიო ბანკის ამ რეიტინგში საქართველოს მაჩვენებლის მნიშვნელოვანი გაუარესება, კერძოდ, საქართველომ უკან დაიწია 39 ადგილით და დღეს იკავებს 116-ე ადგილს.
მსოფლიო ბანკის ლოჯისტიკური ინდექსი კომლექსური მაჩვენებელია და ერთობლიობაში ასახავს ქვეყნის მდგომარეობას შემდეგ სფეროებში: საბაჟო და სასაზღვრო ინფრასტრუქტურის მენეჯმენტის ეფექტურობა; სავაჭრო და სატრანსპორტო ინფრასტრუქტურის ხარისხი; გადაზიდვების განხორციელების სიმარტივე; ლოჯისტიკური მომსახურების კომპეტენცია და ხარისხი",- აცხადებს "ერთიანი ნაციონალური მოძრაობის" ერთ-ერთი ლიდერი ზურაბ ჯაფარიძე.
ჯაფარიძის განმარტებითვე, აღნიშნულ რეიტინგში პოზიციების გაუარესება ნიშნავს რომ: ქვეყანა კარგავს სატრანზიტო პოტენციალს; ქვეყანა კარგავს პოტენციალს იქცეს რეგიონულ ჰაბად; მცირდება ქვეყნის საინვესტიციო მიმზიდველობა, რაც ნეგატიურად აისახება ინვესტიციების შემოდინებასა და ახალი სამუშაო ადგილების შექმნაზე; მცირდება ანაკლიის პორტის მშენებლობის მასშტაბური პროექტის საინვესტიციო მიმზიდველობა.