საქართველოს საგარეო საქმეთა მინისტრი მაია ფანჯიკიძე ტელეფონით ესაუბრა ლატვიელ კოლეგას ედგარს რინკევიჩშს. სატელეფონო საუბრისას მინისტრმა მადლობა გადაუხადა ლატვიის საგარეო უწყების ხელმძღვანელს მისი ინიციატივისთვის, რომლის ფარგლებშიც 20 ოქტომბერს ლუქსემბურგში გაიმართება საქართველოს საგარეო საქმეთა მინისტრის შეხვედრა ევროკავშირის 28 წევრი ქვეყნის საგარეო საქმეთა მინისტრებთან.

სატელეფონო საუბრისას მაია ფანჯიკიძემ ლატვიელ კოლეგას გაუზიარა საქართველოს მთავრობის შეშფოთება ბოლო პერიოდში რუსეთის ფედერაციის დესტრუქციულ განზრახვასთან დაკავშირებით, რაც გამოიხატება მოსკოვსა და სოხუმს შორის ე.წ. სამოკავშირეო და ინტეგრაციის ხელშეკრულების პროექტის შემუშავებაში. მინისტრმა ხაზი გაუსვა საერთაშორისო საზოგადოების აქტიური ჩართულობის მნიშვნელობას, რათა თავიდან იქნეს აცილებული საქართველოს ოკუპირებულ ტერიტორიებზე სიტუაციის ესკალაცია და ხელი შეეწყოს რეგიონში უსაფრთხოებისა და სტაბილურობის განმტკიცების პროცესს. მინისტრმა აღნიშნა, რომ ეს საკითხი იქნება მისი მხრიდან ერთ-ერთი მთავარი განსახილველი თემა ლუქსემბურგში დაგეგმილი შეხვედრის დროს.

სატელეფო საუბრისას მინისტრებმა ასევე მიმოიხილეს 26-27 ნოემბერს, ლატვიის პრეზიდენტის საქართველოში დაგეგმილი ვიზიტი. საქართველოს საგარეო საქმეთა მინისტრმა კმაყოფილებით აღნიშნა, ვიზიტის ფარგლებში ლატვიელ კოლეგასთან შეხვედრის შესაძლებლობა.