მოსკოვის მეტროპოლიტენის სადგურ "ლუბიანკაზე" თავი თვითმკვლელმა-ტერორისტმა ქალმა 17 წლის ჯენეტ აბდურახმანოვამ აიფეთქა. რუსული მედიის ინფორმაციით, ჯენეტ აბდურახმანოვა გასული წლის 31 დეკემბერს ჩატარებული სპეცოპერაციის დროს განადგურებული დაღესტნელი ბოევიკების ლიდერის უმალატ მაგომედოვის ქვრივია.
"აბდურახმანოვამ თავის აფეთქების შედეგად მეტროპოლიტენის 20-ზე მეტი მგზავრის სიცოცხლე შეიწირა", _ წერს გაზეთი "კომერსანტი", თუმცა მეორე ვერსიით, აბდურახმანოვამ თავი მეტროსადგურ "პარკ კულტურიზე" აიფეთქა.
აბდურახმანოვას ამოცნობა (სხვა მონაცემებით მისი გვარი აბდულლაევაა) ჯერ ჯერობით მხოლოდ ფოტოსურათით და მისი დამახასიათებელი ნიშნებით მოხდა.
დაღესტნელი სამართალდამცავების ინფორმაციით, ჯერ ხასავიურტელი, ხოლო შემდეგ ყველა დაღესტნელი ბოევიკების ლიდერმა უმალატ მაგომედოვმა ჯენეტ აბდურახმანოვა ინტერნეტით მაშინ გაიცნო, როდესაც ჯენეტი 16 წლის იყო. შემდეგ მას შეხვედრა დაუნიშნა და ძალით წაიყვანა ცოლად.
30 წლის უმალატ მაგომედოვი გასული წლის 31 დეკემბერს რუსეთის ფედერალური უსაფრთხოებისა და შს სამინისტროს ერთობლივად ჩატარებული სპეცოპერაციის დროს მოკლეს. რუსმა სამართალდამცავებმა დათვალიერებისათვის ის ავტომობილი გააჩერეს რომელშიც რომელშიც მაგომედოვი და სამი მამაკაცი იმყოფებოდა. მაგომედივნა და მისმა თანმხლებმა პირებმა ცეცხლი გახსნეს. რუს სამართალდამცავთა მიერ გახსნილი ცეცხლის შედეგად ოთხივე მათგანი ადგილზე მოკლეს. მაგომედოვი, რუს სამართალდამცავთა ინფორმაციით, კავკასიელი მებრძოლების ლიდერის დოკუ უმაროვის უახლოეს გარემოცვაში შედიოდა.
ის თუ როგორ გაჩნდა ჯენეტი თვითმკვლელ-ქალთა შორის რუსი სამართალდამცავებისათვის ჯერ ჯერობით უცნობია. არის ვარაუდი, რომ იგი ვაჰაბიტების ერთ ერთი იდეოლოგის, ამჟამად განადგურებული საიდ ბურიატსკის გავლენის ქვეშ მოექცა, რომელმაც დაარწმუნა იგი, რომ მას აუცილებლად თავი მსხვერპლად უნდა შეეწირა, იმისათვის, რათა ქმრის მკვლელობის გამო შური ეძია.
გაზეთ "მოსკოვსკი კომსომოლეცის" ინფორმაციით, ჯენეტ აბდურახმანოვას თან ჰქონდა სასიყვარულო ბარათი, რომელზეც არაბულ ენაზე სასიყვარულო გზავნილი იყო დაწერილი. წერილი სრულდება სიტყვებით "შევხვდებით ზეცაში".
ამჟამად კალიგრაფიული ექსპერტიზა მიმდინარეობს იმიტომ რომ წერილი ხელმოწერილი არ იყო, მასში არ არის ნახსენები არც ერთი ადამიანის სახელი და არ არის გარკვეული თუ კონკრეტულად ვისთვის იყო განკუთვნილი იგი.
"არაბული ენა ამჟამად კავკასიაში ძალიან იშვიათად გამოიყენება და ეს მოწმობს იმას, რომ ტერორისტმა ქალმა მომზადება ახლო აღმოსავლეთის ერთ-ერთ სკოლაში გაიარა", _ აცხადებს ექსპერტი.
აღსანიშნავია, რომ მოსკოვის მეტროპოლიტენში მომხდარ აფეთქებებში მონაწილე მეორე თვითმკვლელი-ქალის ვინაობა ჯერ-ჯერობით გაურკვეველი რჩება. თუმცა რუსი სამართალდამცავები აცხადებენ, რომ დიდი ალბათობით ეს ჩეჩენი ქალი მარხა უსტარხანოვა შეიძლება იყოს. თუმცა ეს ინფორმაცია ჯერ ჯერობით დაუდასტურებელია. უსტარხანოვა _ გასული წლის ოქტომბერში ჩატარებული სპეცოპერაციის დროს მოკლული კავკასიელი მებრძოლის საიდ-ემინ ხიზრიევის ქვრივია. როგორც ცნობილია ხიზრიევი ჩეჩნეთის პრეზიდენტზე რამზან კადიროვზე ამზადებდა თავდასხმას. მარხა უსტარხანოვა კი უგზო-უკვლოდ დაკარგულად ითვლებოდა.
მარხას მშობლების თქმით, გოგონა ბოევიკებს ინტერნეტით დაუკავშირდა, ერთი წლის წინ სახლიდან მათთან წავიდა საცხოვრებლად და ხიზრიევს გაყვა ცოლად.
"კომერსანტის" მონაცემებით, თვითმკვლელი ქალები, რომლებმაც მოსკოვის მეტროში თავი აიფეთქეს "ვედენის ჯამაათის" აღსაზრდელები არიან, "ვედენის ჯამაათი" კი პირადად დოკუ უმაროვს ექვემდებარება.
