11 ოქტომბერს, საქართველოს პრემიერ მინისტრის - ირაკლი ღარიბაშვილის, ენერგეტიკის მინისტრის - კახა კალაძისა და თურქეთის ენერგეტიკისა და ბუნებრივი რესურსების მინისტრის - ტანერ ილდიზის თანდასწრებით საქართველოში ფარავანის ჰიდროელექტროსადგური გაიხსნება. ქვეყნის განახლებადი ენერგიის პროექტებში ევრობანკი დღემდე ძირითად დამფინანსებლად მოიაზრება. მას წარმოადგენს ევრობანკის დირექტორი კავკასიის, მოლდოვასა და ბელარუსის რეგიონში - ბრუნო ბალვანერა.
ჰიდროელექტროსადგურის მშენებლობის დასრულება საქართველოსთვის საეტაპო მოვლენაა, რადგან ის მნიშვნელოვნად გააუმჯობესებს ქვეყნის ენერგო მომარაგებას, ენერგეტიკულ დამოუკიდებლობასა და ენერგო-რესურსის ექსპორტს. ობიექტის წარმადობაა 85 მგვ და ის ფარავანის მდინარეზეა აგებული სამცხე-ჯავახეთის რეგიონში, თურქეთთან საზღვრის სიახლოვეს. პროექტი მნიშვნელოვან როლს ითამაშებს სამომავლოდ ქვეყნის უნახხშირბადო ენერგიის წარმოებაში.
ბრუნო ბალვანერას განცხადებით „ევრობანკს ეამაყება, რომ მისი მცდელობებით ქვეყნის განახლებადი ენერგიის განვითარებას ეწყობა ხელი და ამ ძალისხმევამ ნაყოფი უკვე გამოიღო. ეს ობიექტი შეიძლება საეტაპო პროექტად მივიჩნიოთ, რადგან ის არის რიგით პირველი, საქართველოს კერძო სექტორში განხორციელებული ფართომასშტაბიანი ინიციატივა განახლებადი ენერგიის გენერაციის სფეროში. თან მას მასშტაბური მნიშვნელობა აქვს, რადგან მისგან სარგებელს ორივე მოსაზღვრე ქვეყანა მიიღებს."
ევრობანკმა 52 მილიონი დოლარის კრედიტი დაამტკიცა ამ ჰიდროელექტროსადგურის დასაფინანსებლად. საერთაშორისო საფინანსო კორპორაციამ 40.5 მილიონიდოლარი გაიღო, ხოლო დამატებით 23 მილიონი დოლარი კომერციულმა ბანკებმა დააბანდეს. ობიექტი აშენდა თურქული კომპანია „ანადოლუ ჯგუფის" მიერ. ის საქართველოს ელექტრო სისტემას 220 კვ ხაზით უკავშირებს ახალციხის ქვესადგურს, რომელიც ასევე ევრობანკის მიერ იქნა დაფინანსებული.
