პოლიტოლოგ რამაზ კლიმიაშვილის შეფასებით, "ლევან გაჩეჩილაძის ადგილი ქუჩაშია და არა თუნდაც თბილისის საკრებულოში".
ასე ეხმაურება კლიმიაშვილი "ალიანსი საქართველოსთვის" ერთ-ერთი ლიდერის სოზარ სუბარის მზადყოფნას თბილისის საკრებულოს თავმჯდომარეობიდან მოხსნას საკუთარი კანდიდატურა ლევან გაჩეჩილაძის, ან ინგა გრიგოლიას სასარგებლოდ.
"გაჩეჩილაძე ბრწყინვალეა ქუჩაში, მიტინგებზე. გაჩეჩილაძის საქმეა ხალხის შეკრება, გამოყვანა და ყვირილი "მიშა მოვედი", მაგრამ მისი ადგილი სახელმწიფო უწყებაში, მათ შორის საკრებულოში არ არის", - განუცხადა კლიმიაშვილმა "ჯი-ეიჩ-ენს".
რაც შეეხება ინგა გრიგოლიას, პოლიტოლოგის აზრით, ყოფილი ტელეწამყვანი "საკრებულოს გააცოცხლებს".
"ინგა გრიგოლია საკრებულოს გააცოცხლებს, თუკი ასეთი რამ არსებობს დღეს საქართველოში", - განმარტავს პოლიტოლოგი.
ამასთან, მისივე შეფასებით, თბილისის საკრებულოს თავმჯდომარეობის კანდიდატებიდან ყველაზე მაღალი რეიტინგი და გამარჯვების ყველაზე მეტი შანსი სწორედ გრიგოლიას აქვს, თუნდაც იმიტომ, რომ "ძალიან პოპულარულია და სულ ეკრანზე ჩანდა".
შეგახსენებთ, რომ "ალიანსი საქართველოსთვის" ერთ-ერთი ლიდერი სოზარ სუბარი მზადაა თბილისის საკრებულოს თავმჯდომარეობიდან საკუთარი კანდიდატურა მოხსნას, თუკი ოპოზიციური პარტიები ერთიან კანდიდატზე, თუნდაც ლევან გაჩეჩილაძის ან ინგა გრიგოლიას კანდიდატურაზე შეთანხმდებიან.
