აბუ ომარი ქართულ არმიაში მსახურობდა, ამერიკაში გაიწრთვნა, იჯდა ქართულ ციხეში, მოინათლა ჯიჰადისტად, იბრძვის ერაყში და რუსეთს ემუქრება
ბირკიანში, პანკისის ხეობის ამ ლამაზ, ტყით შემოსილ მთებს შორის მოქცეულ სოფელში, დრო გაჩერებული გეგონება. არაფერი არ შეცვლილა ამ ნაცრისფერი სახლის ირგვლივაც, რომელიც „ისლამური სახელმწიფოს" არმიის ერთ-ერთი ყველაზე გავლენიანი და ძლიერი სარდლის ოჯახს ეკუთვნის და რომელსაც აშშ-ში, სირიასა და ერაყში მტრად მოიხსენიებენ. თვითონ სახლი დიდი ვერაფერი შენობაა, ის უბრალო ერთსართულიან, ოთხსარკმელიან ნაგებობას წარმოადგენს, რომელსაც მსხვილი ქვების ყორე აქვს შემოვლებული. ეზოში დაყრილ შეშის გროვასთან თანამგზავრული სატელევიზიო ანტენა მოჩანს... ყველა სტანდარტით აბუ-ომარ ალ-შიშანის („ჩეჩენის") სახლი ღარიბულად და მიტოვებულად გამოიყურება, - წერს ამერიკული გამოცემა „დეილი ბისთ".
„ჯი-ეიჩ-ენი" სტატიას მცირე შემოკლებით გთავაზობთ:
მოარული ხმების თანახმად, ამ დღეებში აბუ ომარი, რომლის ნამდვილი სახელი თარხან ბათირაშვილია, სირიაში ერთ-ერთ ფეშენებელურ ვილაში ცხოვრობს. შესაძლოა ეს ინფორმაცია სინამდვილეს შეესაბამება, ან არასწორია, მაგრამ ის, რომ თარხანი მშობლიური პანკისის ხეობიდან მუსულმან ახალგაზრდობას თავისთან იხმობს ამბოხებულთა რაზმში ჩასაწერად, ამაში საეჭვო არაფერია.
ჟღალწვერიანი აბუ ომარი იმ [ბოროტების] სიმბოლო გახდა, რაშიც შეერთებული შტატები საფრთხეს ხედავს - „ერაყ-ლევანტის ისლამური სახელმწიფოს" („ელის"-ISIS) სახით. მისი ბიოგრაფია კარგადაა ცნობილი: აბუ ომარი საქართველოს არმიის მოსამსახურე იყო, სრული სამხედრო მომზადება კი აშშ-ში გაიარა. აბუ ომარმა შეძლო წინ აღდგომოდა ქურთებისა და ერაყის შეირაღებულ ქვედანაყოფებს, დაემარცხებინა ისინი და მათთან ერთად გაენადგურებინა სირიელი მეომბოხეების ზომიერი ფრთა, რომლებსაც ახლა ვაშინგტონი სასწრაფოდ ეხმარება. ამერიკული დაზვერვის თანახმად, ამჟამად აბუ ომარი „ელის"-ის მმართველი საბჭოს („შურას") გავლენიანი წევრია, „ისლამური სახელმწიფოს" სხვა წამყვან ლიდერებთან ერთად. სწორედ აბუ ომარმა ჩაიგდო ხელში ერაყის სიდიდით მეორე ქალაქი მოსული, ახლა კი იგი ჩრდილოეთ სირიაში დისლოცირებული შეიარაღებული რაზმის მეთაურია, რომლის პოზიციებს ამერიკული ავიაცია მასირებულად ბომბავს. როგორც ამბობენ, მის რაზმში დაახლოებით ათასამდე უცხოელი მსახურობს და შესაძლებელია, მძევლებიც ჰყავს აყვანილი.
აბუ ომარის ცხოვრების ისტორია რუსეთის მეამბოხე პროვინცია ჩეჩნეთიდან იწყება, დედამისი ეროვნებით ჩეჩენი ქალია. მაშინაც კი, როცა აბუ ომარის რაზმის პოზიციებს ამერიკისა და მისი მოკავშირეების ავიაცია ბომბავს, იგი მაინც ვლადიმერ პუტინსა და მის გროზნოელ მეხოტბეებს ემუქრება.
მართალია, პანკისის ხეობა ლამაზი ბუნებითაა განთქმული, მაგრამ ეს ადგილობრივ ახალგაზრდებს ვერაფერში ეხმარება. როგორც „დეილი ბესთ"-ის კორესპონდენტს 17 წლის პანკისელმა ბიჭებმა (ეთნიკურად ჩეჩნებმა) განუცხადეს, სოფელში მათ არავითარი სამუშაო არ აქვთ. დროს იმით კლავენ, რომ სალოცავად მეჩეთში დადიან და სმარტფონებით სირიაში წასულ თავიანთ მეგობრებს ესაუბრებიან. ერთ-ერთი მათი მეგობარი თბილისის ტექნიკური უნივერსიტეტიდან მხოლოდ იმიტომ წამოვიდა, რომ წვერს ატარებდა და ტიპიური ჯიჰადისტის შეხედულება ჰქონდა. ჰოდა, მისი თქმით, ბევრი ჩეჩენი ახალგაზრდა ახლა იმას ფიქრობს, რომ როგორმე ავტობუსით თურქეთამდე ჩააღწიოს, იქიდან კი ჩრდილოეთ სირიაში გადავიდეს და აბუ ომარის რაზმში ჩაეწეროს „ალაჰის სახელით სიკვდილისათვის". ფრონტის ხაზი იმ ადგილებში ქალაქ კობანესთან ახლოს გადის, თურქეთის საზღვართან. მათთვის მტერია ის, ვინც სირიის პრეზიდენტს ბაშარ ასადს ხელისუფ-ლების შენარჩუნებაში ეხმარება.
კონსერვატიულმა სალაფიტურმა ისლამმა ახალგაზრდობა თავის ფრთებ-ქვეშ შეიფარა და ახლა სალაფიტების მოწო-დებით „ათობით მიდიან სირიაში საბრძოლველად, მაგრამ არა ფული-სათვის, არამედ თავიანთი რწმენის სახელით", - ამბობს რეგიონული განვითა-რების ფონდის დირექტორი იზა ბექაური, რომელიც ამ პრობლემას კარგად იცნობს. ჩვენი საუბრის დროს მასთან მოვიდნენ ადგილობრივი მცხოვრებლები და სამძიმარი გამოხატეს 18 წლის ბესო კუშანაშვილის დაღუპვასთან დაკავშირებით, რომელიც სირიაში გასულ კვირას მოკლეს. „ამ რამდენიმე თვის წინათ, ივნისში, როცა იგი უკანასკნელად ვნახე, ამბობდა, რომ თურქეთში წასვლა უნდოდა", - იხსენებს იზა ბექაური. ტრადიციული სუფისტი იმამები ცდილობდნენ გადაეთქმევინებინათ ახალგაზრდებისათვის სირიაში წასვლა, მაგრამ „ჯიჰადისთვის მოწოდება" უფრო ძლიერი აღმოჩნდა.
როგორც საქართველოს ხელისუფლებაში ამბობენ, სირიაში წამსვლელი ახალგაზრდების პრობლემა ნამდვილად არსებობს. ამ ცოტა ხნის წინათ ინტერვიუში საქართველოს პრეზიდენტმა გიორგი მარგველაშვილმა განაცხადა, რომ პანკისელი ახალგაზრდების ჯიჰადისტური განწყობების გაკონტროლება ფაქიზი თემაა და სამოქალაქო უფლებების პატივისცემას უკავშირდება. „ჩვენ თუ მათზე ზეწოლას მოვახდენთ, ეს დემოკრატიული პროცესების გაუფასურება იქნებოდა. სამართალდამცველი ვექტორის გაძლიერებით ჩვენ შეიძლებოდა ეს საკითხი დროებით გადაგვეწყვიტა, მაგრამ საბოლოო ჯამში ეს ჩვენ ტოტალურ კონტროლამდე მიგვიყვანს".
იქნებ მართლაც „სამართალდამცველი ვექტორის" გაძლიერებამ გამოიწვია აბუ ომარის რადიკალიზება? სულ რამდენიმე წლის წინათ ხომ იგი მართლმადიდებლურ ეკლესიაში დადიოდა ქრისტიან მამასთან ერთად და მთაში ცხვარს მწყემსავდა?
„ჩეჩნეთის ომის დროს თარხან ბათირაშვილი ჩეჩენ ამბოხებულებსა და მშვიდობიან მოსახლეობას საქართველოში ჩამოსვლაში ეხმარებოდა", - ამბობს „დეილი ბესთ"-ის ჟურნალისტთან საუბარში შოთა უტიაშვილი, შშ სამინისტროს ყოფილი მაღალჩინოსანი, - როცა იგი მთებში ბილიკებით დადიოდა, მან კარგად შეისწავლა ლანდშაფტი, რუკები, დაეუფლა იარაღის ხმარებას, რაც მას საქართველო-რუსეთის ომის დროს ქართულ სამხედრო დაზვერვაში სამსახურის დროს გამოადგა".
2010 წელს საქართველოს სამამართლომ თარხან ბათირაშვილს სამი წლით თავისუფლების აღკვეთა მიუსაჯა, იარაღის უნებართვოდ ფლობისათვის. საპყრობილეში იგი კონსპირაციულად ეზიარა ისლამურ რელიგიას, წვერი მოუშვა და დაიფიცა, რომ ციხიდან გათავისუფლების შემდეგ ურწმუნოების წინააღმდეგ წმინდა ომს დაიწყებდა. 2012 წელს მას ტუბერკულოზი დაუდგინეს, რის შემდეგაც „ისლამური სახელმწიფოს" ჯარების მომავალი მთავარსარდალი საპყრობილედან გამოუშვეს. თარხან ბათირაშვილი თურქეთში წავიდა და მას შემდეგ იგი საქართველოში აღარავის უნახავს.
24 სექტემბერს აშშ-ის მთავრობამ 28 წლის აბუ ომარი „გლობალურად საშიშ ტერორისტთა" სიაში შეიყვანა, თუმცა მას წარბიც არ შეუხრია. მისი მზერა მიმართულია რუსეთისაკენ, ჩეჩნეთში, სადაც კრემლს ყველაზე გავლენიანი მოკავშირე ჰყავს - რამზან კადიროვი. იმავე 24 სექტემბერს აბუ ომარმა რამზან კადიროვის მოსაკლავად ჯილდოდ 5 მილიონი დოლარი დააწესა, ხოლო ჩეჩნეთის მთავრობის დანარჩენი წევრებისათვის - 500 ათასი დოლარიდან 4 მილიონამდე. ვლადიმერ პუტინი რამზან კადიროვს სირიის პრეზიდენტის ბაშარ ასადის გასაძლიერებლად იყენებს. მართლაც, როგორც კადიროვმა ჟურნალისტებს განუცხადა, „ისლამური სახელმწიფოს" ბევრი ლიდერი თავის დროზე აშშ-ის საიდუმლო აგენტები იყვნენ. „ჩვენ აქაც გხოცავდით და იქაც დაგხოცავთ", - ასე განაცხადა „ელის"-ის ლიდერების გასაგონად რამზან კადიროვმა.
მაისის დასაწყისში „ელის"-ის საველე მეთაურებმა ბაშარ ასადის არმიის ერთ-ერთი სამხედრო-საჰაერო ბაზა აიღეს და ინტერნეტში რეაქტიული გამანადგურებლის სურათი გამოფინეს, რომელზეც თვითონ სხედან და ასე მიაწერეს: „ვლადიმერ პუტინ, ეს თვითმფრინავები თქვენ ბაშარ ასადს მიეცით, ახლა კი მათ თქვენს წინააღმდეგ შემოვაბრუნებთ და ალაჰის წყალობით, მთელ კავკასიას გავათავისუფლებთ, ჩეჩნეთის ჩათვლით. ისალამური სახელმწიფო იქნება და გაფართოვდება".
ასეთი გლობალური ამბიციები თითქოსდა პანკისში მდგარ პატარა სახლს არ უნდა უკავშირდებოდეს, მაგრამ სწორედაც რომ უკავშირდება და მასთან ახლოს დგას....
