"ალიანსი საქართველოსთვის" წარმომადგენელი სოზარ სუბარი მზად არის თბილისის საკრებულოს თავმჯდომარეობიდან საკუთარი კანდიდატურა მოხსნას, თუკი პოლიტიკური პარტიები დედაქალაქის მერის არჩევნებში მხარდაჭერას ირაკლი ალასანიას გამოუცხადებენ.
"რადგან ალიანსს ჰყავს მერის გამოკვეთილი კანდიდატურა, საკრებულოს თავმჯდომარეობის კანდიდატი უნდა დასახელდეს სხვა ოპოზიციური ჯგუფიდან. ეს საჭიროა თანხმობისთვის და, შესაბამისად, გამარჯვებისთვის. დღეს ირაკლი ალასანიაა ის პოლიტიკოსი, რომელსაც ყველაზე მეტად უკავშირდება გამარჯვების იმედი. ამიტომაც არის აუცილებელი, რომ ყველამ, ვისთვისაც ხელისუფლების შეცვლა მნიშვნელოვანია, სწორედ ირაკლი ალასანიას დაუჭიროს მხარი. ეს არის ის აუცილებელი დათმობა, რასაც დღეს ქვეყნის ინტერესები მოითხოვს პოლიტიკოსებისგან", - აცხადებს სუბარი ღია წერილში, რომელიც გაზეთ "რეზონანსში" გამოქვეყნდა.
მისი თქმით, ოპოზიციურ სპექტრში დღეს არსებული სურათი "გამარჯვების პერსპექტივას საკმაოდ ართულებს" და "ნაციონალურ მოძრაობას დიდ ფორას" უქმნის - "ეს არის ის მწარე სიმართლე, რომელსაც თვალი უნდა გავუსწოროთ".
სუბარი ოპოზიციას მოუწოდებს შეთანხმდეს მინიმუმზე, რათა პარტიები დაუპირისპირდნენ არა ერთმანეთს, არამედ ხელისუფლებას, მათ შორის თბილისის მაჟორიტარულ ოლქებშიც.
"ამავე დროს, ამ ფორმულით თითოეული პარტია ინარჩუნებს თვითმყოფადობას, დამოუკიდებლად გამოდის არჩევნებში პროპორციული სიით და საზოგადოებაც თავისუფალია თავის არჩევანში", - აცხადებს სუბარი და აღნიშნავს, რომ "ეს არის არა გაერთიანების მცდელობა, არამედ თანხმობის მიღწევის გზა, რომელსაც გამარჯვებამდე მივყავართ".
ღია წერილში ის საერთოდ არ ახსენებს მოძრაობა "სამართლიანი საქართველოსთვის" ლიდერ ზურაბ ნოღაიდელს, რომლის ფიგურაც არასაპარლამენტო ოპოზიციაში მერის ერთიან კანდიდატზე შეუთანხმებლობის ერთ-ერთ ძირითად მიზეზად იქცა, თუმცა მის პარტნიორებს "კონსერვატიული" და "ხალხის პარტიებიდან" - ზვიად ძიძიგურს, კობა დავითაშვილს, კახა კუკავას, "ზოგ საკითხებში აზრთა სხვადასხვაობის" მიუხედავად, "თანამებრძოლებად" მიიჩნევს და "გამოკვეთილი ოპოზიციური ლიდერის, ირაკლი ალასანიას" მხარდაჭერისკენ მოუწოდებს.
სუბარი მნიშვნელოვნად მიიჩნევს ამ პროცესში "ქრისტიან-დემოკრატებისა" და "მრეწველების" მონაწილეობას - ორივე პარტიას ადგილობრივ არჩევნებზე თავიანთი მერობის კანდიდატები ჰყავთ.
გარდა ამისა, სუბარი აცხადებს, რომ "დაიცავი საქართველოს" თანადამფუძნებელს, ლევან გაჩეჩილაძეს "ძალიან მნიშვნელოვანი როლი აკისრია" და მისი საარჩევნო პროცესში აქტიური ჩართვა "ხელისუფლების დამარცხების სერიოზული წინაპირობაა".
"მას სერიოზული მაკოორდინებელი და დამაბალანსებელი ფუნქციის შესრულება შეუძლია", - მიიჩნევს სუბარი.
"ალიანსი საქართველოსთვის" თანათავმჯდომარე აცხადებს, რომ "ლეიბორისტულ პარტიას", "ეროვნულ ფორუმს", "დემოკრატიულ მოძრაობა - ერთიან საქართველოს", რომლებიც საერთოდ არ იღებენ არჩევნებში მონაწილეობას, შეუძლიათ მოუწოდონ თავიანთ ამომრჩეველს - მივიდნენ არჩევნებზე, რათა მხარი დაუჭირონ არჩევნებში მონაწილე ოპოზიციას და ამით "მნიშვნელოვანი სიტყვა თქვან მიხეილ სააკაშვილისა და ნაციონალური მოძრაობის დამარცხებაში".
"რასაკვირველია, ქვეყანაში არ არის სრულფასოვანი საარჩევნო გარემო, მაგრამ რადგან ამომრჩეველთა დიდ ნაწილს იმედი აქვს, რომ არჩევნებით ხელისუფლების შეცვლა შესაძლებელია, ამიტომ მნიშვნელოვანია, ბოლომდე ამოვწუროთ არჩევნებით ხელისუფლების შეცვლის შესაძლებლობა, ან საბოლოოდ დავრწმუნდეთ, რომ ავტოკრატიის შეცვლა არჩევნებით შეუძლებელია", - აცხადებს სუბარი.
