კომპანია „კოლხეთი და კომპანია" ხობში მესაქონლეობისა და მეფრინველეობის საწარმოს ააშენებს, რომელიც მხოლოდ მეხორცულ მიმართულებაზე იქნება ორიენტირებული. პროექტის განსახორციელებლად, მთავრობამ ინვესტორს ხობში სოფელ შუა ხორგაში მდებარე უძრავი ქონება პირდაპირი მიყიდვის ფორმით უკვე გადასცა.
მთავრობის №1506 განრაგულების თანახმად, „კოლხეთი და კომპანია" ვალდებულია აღნიშნულ მიწის ფართზე 2 წლის ვადაში მესაქონლეობის მერძეული-მეხორცული მიმართულებისა და მეფრინველეობის მეხორცული მიმართულების საწარმოს შექმნას.
იმავდროულად, საპრივატიზებო პირობების შესრულების მიზნით, „კოლხეთი და კომპანია" არანაკლებ 122 220 ლარის ინვესტიციას განახორციელებს.
საპივატიზაციო პირობების მიხედვით, საწარმო ვალდებულია, წარმოების დაწყებიდან პირველი წლის განმავლობაში არანაკლებ 94 900 კგ ქათმის ხორცისა და არანაკლებ 1500 კგ ყველის, არანაკლებ 25%-ის წარმოება უზრუნველყოს.
ხოლო წარმოების დაწყებიდან მეორე წლის განმავლობაში კი არანაკლებ 94 900 კგ ქათმის ხორცისა და არანაკლებ 1500 კგ ყველის 50%-ის წარმოება.
„შპს „კოლხეთი და კომპანიის" მიერ წარდგენილი, განსახორცილებელი ინვესტიციის 10%-ის ოდენობის უპირობო და გამოუხმობი საბანკო გარანტია უზრუნველყოფს, ამ განკარგულების საფუძველზე, შესაბამისი ნასყიდობის ხელშეკრულების გაფორმებასა და ამავე განკარგულების მე-2 პუნქტის „ბ" და „გ" ქვეპუნქტებით გათვალისწინებული საპრივატიზებო პირობების შესრულებას (მათ შორის, ვალდებულებ(ებ)ის შეუსრულებლობისათვის ნასყიდობის ხელშეკრულების საფუძველზე დაკისრებული პირგასამტეხლოს გადახდას)", - აღნიშნულია მთავრობის განკარგულებაში.
