3 სექტემბერს, 20:00 საათზე, საქართველოს კულტურისა და ძეგლთა დაცვის მინისტრი მიხეილ გიორგაძე, რუსთაველის თეატრის მცირე დარბაზში VI საერთაშორისო ფესტივალის „ღამის სერენადების" დასკვნით კონცერტს დაესწრება. კლასიკური მუსიკის ფესტივალი კულტურისა და ძეგლთა დაცვის სამინისტროს მხარდაჭერითა და კულტურის პალატის ორგანიზებით მიმდინარეობს.
ლიანა ისაკაძის მოწვევით, დასკვნით კონცერტში მონაწილეობას იღებენ მსოფლიოში ცნობილი მუსიკოსები, მათ შორის ფლეიტისტი იოსი არნჰეიმი, ვიოლონჩელისტი ალექსანდრ კნიაზევი და პიანისტი სერგეი ბაბაიანი. კამერულ ორკესტრს „ვირტუოზები" ცნობილი ლიტველი დირიჟორი გინტარას რინკევიჩუსი უდირიჟორებს. კონცერტზე შესრულდება მოცარტის, მენდელსონისა და ბეთჰოვენის ნაწარმოებები.
კლასიკური მუსიკის საერთაშორისო ფესტივალი "ღამის სერენადები" პირველად 1982 წელს ბიჭვინთაში გაიმართა. 1991 წელს ფესტივალმა არსებობა შეწყვიტა და მხოლოდ 18 წლის შემდეგ, 2009 წელს განახლდა.
