„საგადასახადო კოდექსში" შესატან ცვლილებებს დადებითად აფასებენ ბიზნესომბუდსმენის აპარატში. როგორც სააგენტო „ჯი-ეიჩ-ენთან" საუბრისას, ბიზნესომბუდსმენის მოადგილემ ზურაბ ძნელაშვილმა განმარტა, „საგადასახადო კოდექსში" შესატანი ცვლილებები, რომელიც ფინანსთა მინისტრის მიერ იქნა წარმოდგენილი, ბიზნესისათვის საინტერესო და სასარგებლო სიახლეებს შეიცავს
„განსაკუთრებით მნიშვნელოვანია, ბაზრობებისთვის სპეციალური სავაჭრო ზონის მოწყობის ვალდებულებისა და დაბეგრვის განსხვავებული წესის გაუქმება - ვინაიდან, არსებული რეგულაციები გაუმართლებლად რთულ და პრაქტიკულად შეუსრულებელ მოთხოვნებს აწესებდა.
გადამხდელებისთვის ასევე სასარგებლო იქნება საჯარო გადაწყვეტილების ინსტიტუტის ამოქმედება, იმ ფორმით, როგორიც პროექტით არის შემოთავაზებული, რაც ხელს შეუწყობს საგადასახადო სისტემაში ერთგვაროვანი პრაქტიკის დამკვიდრებას.
ვფიქრობ, მცირე მეწარმეებისთვის და იმ გადამხდელებისთვის, ვინც საკუთარი ქონების გარეშე ოპერირებენ ბაზარზე, მნიშვნელოვანი სიახლეა 5000 ლარამდე საგადასახადო დავალიანების გადავადების შესაძლებლობის შემოღება ქონებრივი უზრუნველყოფის გარეშე.
ასევე დადებითად უნდა შეფასდეს, სუსტი კაპიტალიზაციით გამოწვეული შეზღუდვების გადავადების ინიციატივა, ვინაიდან, მოქმედი ნორმები დაუხვეწავი, ბუნდოვანი და ბიზნესისთვის გარკვეულწილად შემზღუდველი ხასიათისაა. საბოლოოდ კი, მისი არსებული რედაქციით შენარჩუნება არ მიმაჩნია მიზანშეწონილად"- განმარტავს ზურაბ ძნელაშვილი.
აღსანიშნავია, რომ „საგადასახადო კოდექსში" შესატანი ცვლილებების პროექტში არის ისეთი საკითხებიც, რომელიც უშუალოდ ბიზნესომბუდსმენის აპარატის მიერ არის შეთავაზებული, რაც ფინანსთა სამინისტროს მხრიდან თანამშრომლობის შედეგად, პროექტში ასახულია კიდეც.
ბიზნესომბუდსმენის აპარატის მიერ შეთავაზებულ საკითხებს შორის, ძნელაშვილი შიდა გადამუშავების სასაქონლო ოპერაციაში მოქცეული საქონლის გადამუშავებაზე გაწეული მომსახურების დღგ-სგან გათავისუფლების საკითხს გამოყოფს, რომელიც მისი თქმით, ადგილობრივი წარმოების განვითარებასა და მომსახურების ექსპორტს შეუწყობს ხელს.
„საქართველოს გეოგრაფიული მდებარეობის გათვალისწინებით, აღნიშნული პრეფერენცია დამატებით განაპირობებს ქვეყნის, როგორც რეგიონული ჰაბის განვითარებას და აამაღლებს საქართველოს ეკონომიკურ როლს რეგიონულ ჭრილში.
ასევე მინდა ავღნიშნო, აღიარებული საგადასახადო დავალიანების მქონე პირებისათვის ხანდაზმული დავალიანებების ჩამოწერის გამარტივებული მექანიზმი, რომელიც მართალია გარკვეული სახეცვლილებით, თუმცა აისახა წარმოდგენილ პროექტში"- აცხადებს ბიზნესომბუდსმენის მოადგილე.
ზურაბ ძნელაშვილის თქმით, „საგადასახადო კოდექსში" შესატანი ცვლილებების პროექტში ზოგიერთი საკითხი დაზუსტებითი ხასიათისაა, რაც კოდექსის ნორმათა არაერთგვაროვანი ინტერპრეტირების შესაძლებლობებს ამცირებს, ეს კი არანაკლებ მნიშვნელოვანია გადასახადის გადამხდელებისთვის.
შეგახსენებთ, რომ „საგადასახადო დოდექსში" შესატანი ცვლილებების შესახებ ცნობილი 7 აგვისტოს გახდა. როგორც ფინანსთა მინისტრმა აღნიშნა, კანონპროექტის მიხედვით მნიშვნელოვანი ცვლილებები გათვალისწინებული, მათ შორის:
• შიდა გადამუშავებაში მოქცეული საქონლის გადამუშავებისთვის გაწეული მომსახურება თავისუფლდება დამატებული ღირებულების გადასახადისგან
(ცვლილებები ხელს შეუწყობს იმ ადგილობრივი საწარმოების განვითარებას, რომლებიც უცხოურ კომპანიებს უწევენ მომსახურებას. შეიქმნება კონკურენტუნარიანი გარემო ადგილობრივი ბიზნესისთვის. ამგვარი საწარმოების ხელმძღვანელებს შესაძლებლობა მიეცემათ დაზოგილი თანხები კვლავ ჩადონ ბიზნესის განვითარებაში, შექმნან ახალი სამუშაო ადგილები);
• ჩამოწერას დაექვემდებარება:
2005 წლის 1 იანვრამდე წარმოშობილი და დღემდე გადაუხდელი საგადასახადო დავალიანება, თუ გადამხდელს შემდგომ პერიოდში აქტივობები არ უფიქსირდება;
2009 წლის 1 იანვრამდე წარმოშობილ აღიარებულ საგადასახადო დავალიანებაზე დარიცხული საურავი და 2009 წლის 1 იანვრამდე დარიცხული აღიარებული ჯარიმა, აღიარებული გადასახადის თანხის გადახდის პირობით, თუ პირს შემდგომ პერიოდში აქტივობები არ უფიქსირდება;
(განსაკუთრებით მნიშვნელოვანია, რომ მომზადებული ცვლილებების მიხედვით, ჩამოიწერება საკონტროლო სალარო-აპარატის გამოყენების წესების დარღვევისთვის ფიზიკური პირისათვის 2013 წლის 1 იანვრამდე დაკისრებული დარიცხული და გადაუხდელი ჯარიმა, რაც მნიშვნელოვანი შეღავათი იქნება ჩვენი მეწარმეებისთვის, განსაკუთრებით მათთვის, ვისთვისაც წინა წლებში დაკისრებული ჯარიმები მძიმე ტვირთად აწვებოდათ).
• საგადასახადო დავალიანების გადახდა გადავადება მათთვის, ვისი საგადასახადო დავალიანების თანხა არ აღემატება 5 ათას ლარს
(გადასახადის გადამხდელი უზრუნველყოფის საშუალებების წარდგენის გარეშე შეძლებს საგადასახადო დავალიანების გადავადებას ერთი წლით, თუკი თანხა არ აღემატება 5 000 ლარს. შედეგად, მცირე ბიზნესი შეძლებს საქმიანობის გაგრძელებას და საწარმოს განვითარებას).
• მარტივდება ტურისტული საწარმოს საგადასახადო ვალდებულებების შესრულების მექანიზმები
(ცვლილებები ხელს შეუწყობს სასტუმრო ბიზნესის განვითარებას, ქვეყნის ტურისტული პოტენციალის გაძლიერებას. ტურისტული ბიზნესის განვითარების ფარგლებში ახალი ინფრასტრუქტურისა და სამუშაო ადგილების შექმნას)
• ფინანსთა მინისტრისთვის საჯარო გადაწყვეტილების გამოცემის უფლებამოსილების მინიჭება
„ცვლილების მიზანია, ფინანსთა სამინისტროს ტრანსპარენტულობა, საგადახადო კანონმდებლობის სადაო ნორმებზე ფინანსთა სამინისტროს პოზიციის საჯაროდ დაფიქსირება, საჯარო გადაწყვეტილების ინსტიტუტის რეალურად ამოქმედება, ბიზნესისათვის საგადახადო კანონმდებლობის სადაო ნორმებზე ფინანსთა სამინისტროს პოზიციის წინასწარ გაცნობა. აღნიშნული გადაწყვეტილება შეამცირებს საგადასახადო დავების რისკებს, მეწარმეს შეეძლება გაეცნოს ფინანსთა მინისტრის საჯარო გადაწყვეტილებას მისთვის აქტუალურ საგადასახადო ნორმასთან დაკავშრებით და იხელმძღვანელოს აღნიშნული გადაწყვეტილებით.
ფინანსთა სამინისტროს მხრიდან ბიზნესთან დიალოგი მომავალშიც აქტიურად გაგრძელდება, რათა მათ ჰქონდეთ დეტალური ინფორმაცია საგადასახადო კოდექსში შესატან ცვლილებებთან დაკავშირებით. სამინისტრო მზადაა ყველა გადაწყვეტილება მიიღოს ბიზნესსექტორის წარმომადგენლებთან კონსულტაციების შედეგად", - აცხადებენ ფინანსთა სამინისტროში.
