2010 წლის 1 ნოემბერში, აჭარის ფინანსთა და ეკონომიკის სამინისტროსა და შპს ,,ჯიი XXI"-ს შორის გაფორმდა ნასყიდობის ხელშეკრულება, რომლის მიხედვითაც კომპანიას პირდაპირი მიყიდვის ფორმით, ბათუმში, კობალაძისა და ინასარიძის ქუჩების კვეთაში მდებარე დაუმთავრებელი მშენებლობა და მასზე დამაგრებული 2884 კვ.მ არასასოფლო-სამეურნეო დანიშნულების მიწის ნაკვეთი, გადაეცა.

ხელშეკრულების მიხედვით, ,,ჯიი XXI"-ს 50 თვეში არანაკლებ 20 000 კვ.მ. საერთო ფართობის შენობა-ნაგებობა უნდა აეშენებინა, სადაც საცხოვრებელი, კომერციული და საოფისე ფართები უნდა განთავსებულიყო. პროექტი ინვესტორს, ხელშეკრულების მიხედვით 4 მლნ დოლარის ინვესტიციის განხორციელებას ავალდებულებდა.

აჭარის მთავრობის ინფორმაციით, ინვესტორმა ხელშეკრულებით დადგენილ ვადაში გადაიხადა ნასყიდობის ფასი 100 000 ლარი. ასევე ხელშეკრულების მიხედვით, კომპანიის მიერ მოხდა ბათუმში, კობალაძისა და ინასარიძის კვეთაში მდებარე მშენებარე მრავალბინიანი სახლის 29 ერთეული საცხოვრებელი ბინების (საერთო ფართი 1917,8კვმ) საკუთრების უფლებით გადმოცემა აჭარის ავტონომიური რესპუბლიკის საკუთრებაში.

„აჭარის ავტონომიური რესპუბლიკის ფინანსთა და ეკონომიკის სამინისტროში წარდგენილ იქნა შპს ,,ჯიი-XXI"-ს 01.07.2014 წლის N34 წერილი, სადაც აღნიშნულია, რომ მიმდინარეობის მრავალფუნქციური სახლის მშენებლობა, ამასთან, მყიდველი აღნიშნავს, რომ სამშენებლო პროექტში შევიდა გარკვეული სახის ცვლილებები, რომლითაც გაიზარდა შესასრულებელ სამუშაოთა მოცულობა და სამუშაოები საჭიროებს გაზრდილ ვადებს. აღნიშნულთან დაკავშირებით, კომპანიის მიერ მოხდა საპროექტო სანებართვო დოკუმენტაციაში ცვლილებების შეტანა, რის საფუძველზეც სახლის ექსპლუატაციის მიღების ვადად განისაზღვრა 2016 წლის 14 ნოემბერი. გამომდინარე აქედან, შპს ,,ჯიი XXI"-ე ითხოვდა ნასყიდობის ხელშეკრულებით გათვალისწინებული ვალდებულებების ვადა 50 თვე შეიცვალოს და განისაზღვროს 72 თვის ვადით", - განმარტავენ აჭარის მთავრობაში.
თავის მხრივ კი რეგიონის მთავრობამ ნასყიდობის ხელშეკრულებით განსაზღვრულ საპრივატიზებო პირობების შეცვლაზე მიიღო გადაწყვეტიულება და შპს ,,ჯიი XXI"-ს ვალდებულებების შესრულების ვადად 50 თვის ნაცვლად 72 თვე განუსაზღვრა.