2005 წლამდე წარმოშობილი გადაუხდელი საგადასახადო დავალიანება და 2009 წლამდე დარიცხული საურავი ჩამოიწერება, - ამის შესახებ ფინანსთა მინისტრმა ნოდარ ხადურმა მთავრობის სხდომის დასრულების შემდეგ ჟურნალისტებს განუცხადა. მისი თქმით, სამინისტრო განაგრძობს მუშაობას ახალ საკანონმდებლო ინიციატივებზე, რომელიც მიმართულია სამართლიანი და ეფექტური ადმინისტრირებისათვის საჭირო სამართლებრივი ბაზის შექმნისკენ, ჯარიმებისა და სანქციების შემდგომი ლიბერალიზაციისკენ.
"ჩამოწერას დაექვემდებარება 2005 წლის 1 იანვრამდე წარმოშობილი და დღემდე გადაუხდელი საგადასახადო დავალიანება, თუ გადამხდელს შემდგომ პერიოდში აქტივობები არ უფიქსირდება; 2009 წლის 1 იანვრამდე წარმოშობილ აღიარებულ საგადასახადო დავალიანებაზე დარიცხული საურავი და 2009 წლის 1 იანვრამდე დარიცხული აღიარებული ჯარიმა, აღიარებული გადასახადის თანხის გადახდის პირობით, თუ პირს შემდგომ პერიოდში აქტივობები არ უფიქსირდება", - განაცხადა მინისტრმა და აღნიშნა, რომ აღნიშნული ცვლილება მნიშვნელოვანი შეღავათი იქნება ჩვენი მეწარმეებისთვის, განსაკუთრებით მათთვის, ვისთვისაც წინა წლებში დაკისრებული ჯარიმები მძიმე ტვირთად აწვებოდათ.
