„საქსტატის" ინფორმაციით, ივლისში, ივნისთან შედარებით ,საქართველოში ინფლაციის დონემ -0,6 პროცენტი შეადგინა. სტატისტიკის ეროვნულ უწყებაში განმარტავენ, რომ ინფლაციის მაჩვენებლის კორექტირებაზე გავლენა სურსათისა და უალკოჰოლო სასმელების და ასევე ჯანმრთელობის დაცვის ჯგუფში ფასების ცვლილებამ განაპირობა.

როგორც „საქსტატში" განმარტავენ, ინფლაციის მაჩვენებლის ფორმირებაში ძირითადი გავლენა იქონია ფასების ცვლილებამ სურსათისა და უალკოჰოლო სასმელების ჯგუფზე. აღნიშნულ ჯგუფში ფასები შემცირდა 2,1 პროცენტით, რაც ივლისის ინფლაციის მთლიან მაჩვენებელზე -0,62 პროცენტული პუნქტით აისახა. აღსანიშნავია ფასების კლება შემდეგ ქვეჯგუფებზე: ბოსტნეული და ბაღჩეული (-19,3 პროცენტი) და ხილი და ყურძენი (-9,4 პროცენტი);
აღნიშნული კლების პარალელურად ფასები გაიზარდა 0,7 პროცენტით ჯანმრთელობის დაცვის ჯგუფზე, რამაც მთლიან ინდექსში 0,07 პროცენტული პუნქტი შეიტანა. ჯგუფში ფასები გაიზარდა შემდეგ ქვეჯგუფებზე: საავადმყოფოების მომსახურება (1,7 პროცენტი), სამედიცინო პროდუქცია, აპარატურა და მოწყობილობა (0,5 პროცენტი).