ფრაქცია „ქართული ოცნება - მრეწველებმა" მომხმარებელთა უფლებების დაცვის მიზნით, გენმოდიფიცირებული პროდუქტების ეტიკეტირების საკანონმდებლო ინიციატივა შეიმუშავეს.
კანონპროექტი „სურსათად/ცხოველის საკვებად განკუთვნილი გენეტიკურად მოდიფიცირებული ორგანიზმებისა და მათგან წარმოებული გენმოდიფიცირებული პროდუქტის ეტიკეტირების შესახებ" დღეს აგრარულ საკითხთა კომიტეტის სხდომაზე ფრაქციის სახელით დეპუტატებმა, გოგი თოფაძემ და ზურაბ ტყემალაძემ წარმოადგინეს. ზურაბ ტყემალაძის განმარტებით, შემოთავაზებული კანონპროექტით მომხმარებლი ინფორმირებული იქნება, თუ რა სახის პროდუქციას მოიხმარს და მას თავისუფალი არჩევანის გაკეთების შესაძლებლობა მიეცემა.
„ჩვენ მიერ შემოთავაზებული კანონპროექტები საქართველოს კანონმდებლობას გენმოდიფიცირებული პროდუქტის სფეროში ევროკავშირის კანონმდებლობასთან და საერთაშორისო აქტებით დადგენილ სამართლებრივ ნორმებთან დააახლოებს",- აღნიშნა ზურაბ ტყემალაძემ.
მისივე თქმით, კანონპროექტით რეგულირდება გენმოდიფიცირებული პროდუქტების ეტიკეტირების ძირითადი მოთხოვნები, ასეთი პროდუქციის საბაზრო ქსელში განთავსების, მომხმარებლისთვის მიწოდების და იმპორტის საკითხები, ხოლო მათ შესრულებაზე სახელმწიფო კონტროლი წესდება. ტყემალაძის განმარტებით, ეტიკეტებზე კონტროლს განახორციელებს სოფლის მეურნეობის სამინისტრო, იმპორტზე კი - ფინანსთა სამინისტრო.
კანონპროექტით ასევე განისაზღვრება პასუხისმგებლობის საკითხებიც ამ მოთხოვნათა დარღვევის შემთხვევაში. კანონის ამოქმედების ვადად ფრაქცია 2015 ლის 1 იანვარს მიიჩნევს.
