ტურიზმის ეროვნული ადმინისტრაციის ორგანიზებით საქართველოში ბელორუსი ჟურნალისტები იმყოფებიან. მედიის წარმომადგენლების ათკაციანი ჯგუფი უკვე ეწვია თბილისს, სიღნაღს, წინანდალს, ყვარელს, გორს, ბორჯომს, საირმეს, ქუთაისსა და წყალტუბოს. დღეს კორესპონდენტები ბათუმს დაათვალიერებენ. ერთკვირიანი პრეტურის დასრულების შემდეგ ბელორუსი ჟურნალისტები
კულტურული ტურიზმის, აჭარის რეგიონის ტურისტული პოტენციალის, სამედიცინო კურორტებისა და ღვინის ტურიზმის შესახებ სიუჟეტებსა და სტატიებს მოამზადებენ. მედიის წარმომადგენლები უკვე გაესაუბრნენ საქართველოს ტურიზმის ეროვნული ადმინისტრაციის ხელმძღვანელს, გიორგის სიგუას.
საქართველოში ბელორუსიდან შემოსული ვიზიტორების რაოდენობა ყოველწლიურად საკმაოდ დიდი ტემპით იზრდება. 2012 წელს მათმა რაოდენობამ 7 972, ხოლო 2013 წლისათვის 12 915 შეადგინა, რაც წინა წლის მაჩვენებელთან შედარებით 62%-ით მეტია. წელს, 6 თვის მონაცემებით საქართველოს 6 ათასამდე ბელორუსი საერთაშორისო მოგზაური ეწვია, რაც წინა წილის ანალოგიური პერიოდთან შედარებით 45%-მეტია.