ფინანსთა მინისტრის, ნოდარ ხადურის ინფორმაციით, 2013 წელს მთლიანი შიდა პროდუქტის რეალური ზრდის პროგნოზი 6 პროცენტს შეადგენდა, ხოლო ნომინალურ გამოხატულებაში იგი 28.9 მლრდ ლარი იყო. 2013 წელს მთლიანი შიდა პროდუქტის რეალური ზრდა 3,2 % იყო და 26.8 მილიარდი ლარი შეადგინა.
მინისტრის განმარტებითვე, ეკონომიკური აქტივობა გაზრდილია თითქმის ყველა სექტორში. მთლიანი შიდა პროდუქტის მაღალი ზრდა დაფიქსირდა ისეთ სექტორებში, რომლებზეც საქართველოს კანონმდებლობით დაწესებულია საგადასახადო შეღავათები.
ხადური აცხადებს, რომ მთლიანი შიდა პროდუქტის ზრდაში ყველაზე მნიშვნელოვანი წვლილი ვაჭრობის, გადამამუშავებელი მრეწველობის, სოფლის მეურნეობის დარგებმა და უძრავი ქონებით ჩატარებულმა ოპერაციებმა შეიტანეს. მისივე თქმით, ექსპორტი 22, 4 %-ით გაიზარდა. საშუალო წლიურმა ინფლაციამ 0.5 % შეადგინა. 2013 წლის სახელმწიფო ბიუჯეტის შემოსავლების საპროგნოზო მაჩვენებელი 7422 500 ათასი ლარით განისაზღვრა, საანგარიშო პერიოდში კი საპროგნოზო მაჩვენებლის 92.1% იქნა მობილიზებული.
