„არბიტრაჟის შესახებ" კანონში შესატანი ცვლილებები დღეს ბიზნესის წარმომადგენლებს სასტუმრო „რედისონში" გამართულ შეხვედრაზე გააცნეს, რომელსაც საქართველოს ვიცე-პრემიერი, ეკონომიკისა და მდგრადი განვითარების მინისტრი გიორგი კვირიკაშვილი და საქართველოს იუსტიციის მინისტრი თეა წულუკიანი ესწრებოდნენ. კანონპროექტის ინიციატორი საქართველოს მთავრობაა.
როგორც შეხვედრაზე გამართულ პრეზენტაციაზე ითქვა, კანონპროექტის მიღების მთავარი მიზანია შეიცვალოს არბიტრაჟის ინსტიტუტის განვითარების შემაფერხებელი ფაქტორები, შეიქმნას ამ ინსტიტუტისადმი კეთილგანწყობილი გარემო და გაიზარდოს არბიტრაჟის, როგორც დავების გადაწყვეტის ალტერნატიული მექანიზმის სანდოობა და პოპულარობა.
„აუცილებელია, რომ ბიზნეს-დავები სპეციალური კომპეტენციის მქონე მოსამართლეებმა განიხილონ, ეს კომპეტენცია უნდა იყოს ძალიან მაღალი, რომ დამოუკიდებელი არბიტრაჟის სისტემა იყოს ეფექტიანი. აქ ძალიან დიდი მნიშვნელობა აქვს დროს და დამოუკიდებლობის ხარისხს. დღევანდელი ცვლილებები დამოუკიდებელი საარბიტრაჟო ინსტიტუტის შექმნის თაობაზე არის ძალიან მნიშვნელოვანი ელემენტი ბიზნეს-გარემოს გაუმჯობესების კუთხით. ჩვენ გვაქვს მანკიერი პრაქტიკის გამოცდილება წარსულში, ამიტომ წარსულის შეცდომებზე ბევრი ვისწავლეთ და შესაბამისი დასკვნები გამოვიტანეთ. ყველაფერს გავაკეთებთ, რომ დამოუკიდებელი არბიტრაჟის სისტემაში არ მოხდეს კორუფციული გარიგებები" - განაცხადა გიორგი კვირიკაშვილმა.
„ჩვენი მიზანია, რომ ბიზნესმენებს ჰქონდეთ მარტივად და ნაკლებ ფასად დავების გადაწყვეტის საშუალება, არ იყვნენ იძულებულნი, რომ ყოველ დავაზე სასამართლოში იარონ. მათ თავად უნდა გადაწყვიტონ, პოტენციური დავები მოსამართლემ განიხილოს თუ არბიტრაჟმა. გარდა ამისა, როცა არბიტრაჟის გადაწყვეტილება იქნება ცნობილი სასამართლოს მიერ აღსასრულებლად ვარგისად, სასამართლოში ჩვენ დავადგენთ ძალიან პატარა თანხას, რათა არბიტრაჟის გზით მოსიარულე ბიზნესმენს არ მოუწიოს დიდი თანხის გადახდა ჯერ არბიტრაჟისთვის და შემდეგ სასამართლოსთვის. სასამართლოში ბაჟი იქნება სიმბოლური", - აღნიშნა თეა წულუკიანმა.
"არბიტრაჟის შესახებ" საქართველოს კანონში შესატანი ცვლილებების თანახმად, ხდება "არბიტრაჟის შესახებ" კანონის მე-9 მუხლის ხარვეზის გამოსწორება, რომლის მიხედვითაც, სასამართლოს შეუძლია, უარი თქვას სარჩელის მიღებაზე ან შეწყვიტოს საქმის წარმოება მხოლოდ საარბიტრაჟო განხილვის დაწყების შემდეგ. შემოთავაზებული ცვლილების მიხედვით დგინდება, რომ საარბიტრაჟო შეთანხმების არსებობის შემთხვევაში მხარის მოთხოვნით სასამართლო შეწყვეტს საქმის წარმოებას. წარმოდგენილი ცვლილებებით, თუ საარბიტრაჟო შეთანხმების ორივე მხარე ფიზიკური პირია, მათ აღარ მოეთხოვებათ შეთანხმების სანოტარო წესით დამოწმება ან ადვოკატთა ხელმოწერა; არბიტრაჟის კომპეტენციის საკითხის გადაწყვეტას რაიონული (საქალაქო) სასამართლოს ნაცვლად განახორციელებს სააპელაციო სასამართლო.
