საჯარო რეესტრის ეროვნული სააგენტო 2014-2016 წლებში სანიველირო ქსელის მოკვლევა-რეკონსტრუქციის სამუშაოებს განახორციელებს.
სახელმწიფო სანიველირო ქსელი ქვეყნის ტერიტორიის სიმაღლეების ერთიან სისტემას წარმოადგენს, რაც დედამიწის ტოპოგრაფიული გადაღებისა და საინჟინრო-გეოდეზიური სამუშაოების საფუძვლად გამოიყენება.
სახელმწიფო სანიველირე სიმაღლური ქსელი უზრუნველყოფს სამეცნიერო დარგების, დედამიწის ფორმისა და მისი ზედაპირის ვერტიკალური მოძრაობის შესწავლას. აღნიშნული ქსელის გამართულობა მნიშვნელოვანია მშენებლობის პროექტირებისათვის, ჰიდროენერგეტიკული ამოცანების გადასაწყვეტად, ქვეყნის ტერიტორიის ეკონომიკური შეფასებისათვის, აერონავიგაციის თვის და სახელმწიფო მნიშვნელობის სხვა დარგებისთვის.
საქართველო სეისმურად აქტიური ზონაა, ტერიტორიის დიდი ნაწილი მთაგორიანია. აქედან გამომდინარე, დედამიწის ქერქის დინამიკის შესწავლისა და მონიტორინგისათვის სანიველირო ქსელის გამართული ფუნქციონირება უმნიშვნელოვანესია.
80-იანი წლებიდან მოყოლებული ქვეყანაში ქსელის აღდგენა-განახლების მიმართულებით სამუშაოები არ ჩატარებულა. წინასწარი ინფორმაციით, სანიველირე სვლების, რეპერებისა და მარკების ნაწილი დაზიანდა ან განადგურდა. მისი აღდგენა-განახლებისთვის საჯარო რეესტრმა სანიველირო ქსელის მოკვლევა-რეკონსტრუქციის პროექტი დაიწყო.
ადრე დაგებული სანიველირე სვლების, რეპერებისა და მარკების საველე მოკვლევა 2014 წლის ოქტომბრამდე დასრულდება. მოკვლევის მიზანია უშუალოდ ადგილზე მოიძიონ და დაადგინონ, ფიზიკურად რამდენად არის შენარჩუნებული არსებული ინფრასტრუქტურა. პროექტის შემდეგ ეტაპზე, დაზიანებული სანიველირე სვლების, რეპერებისა და მარკების აღდგენა მოხდება.
საქართველოს მასშტაბით სულ 2000-მდე სანიველირო ნიშანია მოსაკვლევი. მიმდინარე წელს დასრულდება 1108 სანიველირო ნიშნის მოკვლევა, მათ შორის: გრავიმეტრიული -4, ფუნდამენტალური - 35, კედლის - 305, კლდის და ყამირის 731.
მოკვლევის შედეგად შეიქმნება სახელმწიფო სიმაღლური ქსელის მონაცემთა ბაზა, ასევე საქართველოს ზუსტი ციფრული კვაზიგეოიდალური (სიმაღლური) მოდელი, რომელიც ჩაიტვირთება GPS - მიმღებებში და შესაძლებელს გახდის ადგილზე განისაზღვროს საჭირო წერტილების აბსოლუტური სიმაღლეები.
პროექტის დასრულება 2016 წლის ბოლოსთვის არის დაგეგმილი.
