აჭარა ტურისტულ სეზონს ახალი ტურისტული საინფორმაციო ცენტრებით ხვდება. აჭარის ტურიზმის დეპარტამენტის ინფორმაციით, ახალი საინფორმაციო ცენტრი, ბათუმის ტურისტულად ერთ-ერთი ყველაზე აქტიური ღირშესანიშნაობის - „საბაგირო გზის" მიმდებარედ, გოგებაშვილის ქუჩაზე გაიხსნა.
ახალი საინფორმაციო ცენტრი ზაფხულის განმავლობაში 24 საათი იმუშავებს. ტურიზმის საინფორმაციო ცენტრი ფუნქციონირებს, თუმცა მისი ოფიციალური გახსნა ბათუმსა და ქობულეთში 9 ივლისს, 11 საათზე იგეგმება.
ტურისტებისათვის ინფორმაციის ხელმისაწვდომობის გასაუმჯობესებლად ახალი საინფორმაციო ცენტრი გაიხსნა ასევე ქობულეთის ცენტრში, აღმაშენებლის გამზირზე.
10 ივლისს 11 საათზე ტურიზმის ახალი საინფორმაციო ცენტრები გაიხსნება შუახევის, ქედისა და ხულოს მუნიციპალიტეტების ცენტრალურ მაგისტრალებზე. აღსანიშნავია, რომ 2014 წლის სეზონზე აჭარის მასშტაბით 8 საინფორმაციო ცენტრი მოემსახურება რეგიონის სტუმრებს.
მასალის გამოყენების პირობები
