მიმდინარე წლის 7 ივლისს, ფინანსთა სამინისტროში გამართულ სამუშაო შეხვედრაზე ინფრასტრუქტურული პროექტების მიმდინარეობა განიხილეს.
შეხვედრას დაესწრნენ ფინანსთა მინისტრი ნოდარ ხადური, რეგიონული განვითარებისა და ინფრასტრუქტურის მინისტრი ელგუჯა ხოკრიშვილი, კულტურისა და ძეგლთა დაცვის მინისტრი გურამ ოდიშარია, აგრეთვე სამეგრელო-ზემო სვანეთში სახელმწიფო რწმუნებულ-გუბერნატორი ლევან შონია.
მინისტრებმა შესაბამისი სამსახურების წარმომადგენლებისგან მოისმინეს დეტალური ინფორმაცია როგორ მიმდინარეობს სატენდერო წინადადებების მომზადება, რა ეტაპზეა საპროექტო სამუშაოები რეგიონებში განსახორციელებელი მნიშვნელოვანი ინფრასტრუქტურული პროექტების, მათ შორის, კულტურული მემკვიდრეობის ძეგლების აღდგენა-რეაბილიტაციის კუთხით.
როგორც შეხვედრაზე აღინიშნა, მთავრობისთვის პრიორიტეტულია კიდევ უფრო დაჩქარდეს საინვესტიციო პროექტების განხორციელება, რაც ხელს შეუწყობს ქვეყნის ეკონომიკის ზრდას და სამუშაო ადგილების შექმნას, რეგიონებში ტურისტული ნაკადის გაზრდას და მოსახლეობის ეკონომიკური მდგომარეობის გაუმჯობესებას.
