ქართულ ეროვნულ ვალუტას უკვე საკუთარი სიმბოლო აქვს. სებ-ის ინფორმაციით, 8 ივლისს, 12:00 საათზე, საქართველოს ეროვნულ ბანკში ლარის სიმბოლოს პრეზენტაცია გაიმართება.
როგორც ცნობილია, რამდენიმე თვის უკან, ქართული ფულის - ლარის სიმბოლოს შესარჩევმა დროებითმა კომისიამ, რომლის შემადგენლობაში შედიან ეროვნული ბანკის, პარლამენტის საფინანსო-საბიუჯეტო კომიტეტის, ჰერალდიკის სახელმწიფო საბჭოს, კულტურისა და ძეგლთა დაცვისა და განათლებისა და მეცნიერების სამინისტროების წარმომადგენლები (სულ 12 წევრი), წარმოდგენილი 231 ნიმუშიდან 5 საუკეთესო შეარჩია. საბოლოო გამარჯვებული ნიმუშის გამოვლენაში ჩაერთო
დაინტერესებული საზოგადოებაც. ამ მიზნით, ეროვნული ბანკის ოფიციალურ ვებგვერდზე სპეციალირი გამოკითხვაც ჩატარდა.
აღსანიშნავია, რომ საქართველოს ეროვნულმა ბანკმა ლარის სიმბოლოს შესარჩევი კონკურსი 2013 წლის 27 დეკემბერს გამოაცხადა. ქართული ფულის - ლარის სიმბოლოს შემოღება ხელს შეუწყობს ეროვნული ვალუტის პოპულარიზაციას როგორც საქართველოში, ისე მის ფარგლებს გარეთ. ასევე, სიმბოლოს პოპულარობა გაზრდის ლარის ცნობადობას საზოგადოებაში და შესაბამისად დადებითად აისახება ქართული ფულის იმიჯზე.
