შს მინისტრი ალექსანდრე ჭიკაიძე მისი უწყების მიერ დანაშაულის სტატისტიკის გამოქვეყნებას ეხმიანება და აცხადებს, რომ შს შესანიშნავი სტატისტიკა აქვს. როგორც საკითხის კომენტირებისას ჭიკაიძემ განმარტა პოლიტიკური ძალების მხრიდან განცხადებები ქვეყანაში კრიმინალის შესაძლო მატების შესახებ სიმართლეს არ შეესაბამება და ავანტიურის ნაწილია.
„ის განცდები, რასაც ქმნიან გარკვეული პოლიტიკური ძალები, ეს არის მტკნარი სიცრუე, არ შეესაბამება სიმართლეს. მინდა ვთქვა, რომ შესანიშნავი სტატისტიკა აქვს სამინისტროს. ის, ვინც ცდილობს, რომ მოახდინოს სამინისტროს დისკრედიტაცია, არის მიუღებელი ჩემთვის. თქვენ თვითონვე განიხილავთ სამინისტროს სტატისტიკას, შეხედავთ, გაუმჯობესებულია მდგომარეობა, კრიმინოგენული სიტუაცია, ნარკომანიის მიმართულებით, ყველა მიმართულებით სტატისტიკა გაუმჯობესებულია. ეს არის დაზუსტებული, არანაირი ცდომილება არ არსებობს. ეს არის მხოლოდ პოლიტიკური ძალების მიერ პოლიტიკური ავანტიურისთვის, შექმნან საზოგადოებაში განცდა, რომ კრიმინალმა მოიმატა ქვეყანაში. ეს არ შეესაბამება რეალობას. ეს არის კარგად გაწერილი ანტიპიარი სამინისტროს და ხელისუფლების მიმართ, რითაც საზოგადოებაში უნდათ განწყობის შექმნან, რომ ქვეყანაში არის კრიმინოგენული სიტუაცია დაძაბული", _განაცხადა ჭიკაიძემ.
შინაგან საქმეთა სამინისტრო 2014 წლის 5 თვის და მაისის თვის დანაშაულის სტატისტიკას აქვეყნებს. 2014 წლის 5 თვეში შსს-ს ტერიტორიული დანაყოფების საგამოძიებო ქვემდებარეობის მიხედვით რეგისტრირებულია 11912 დანაშაული, აქედან 7932 დანაშაული გაიხსნა. დანაშაულის გახსნის კოეფიციენტია 66,59%. წინა წლის ანალოგიურ საანგარიშო პერიოდთან შედარებით დანაშაულმა 9.86 %-თ იკლო.
2014 წლის მაისის თვეში შსს-ს ტერიტორიული დანაყოფების საგამოძიებო ქვემდებარეობის მიხედვით რეგისტრირებულია 2250 დანაშაული, აქედან 1388 დანაშაული გაიხსნა. დანაშაულის გახსნის კოეფიციენტია 61,69%. ხოლო წინა წლის ანალოგიურ საანგარიშო პერიოდთან შედარებით დანაშაულის პროცენტული კლებაა -13.63 %.
