დონეცკის ოლქის ქალაქი მარიუპოლი სპეცოპერაციის ჩატარების შედეგად უკრაინელ სამხედროთა კონტროლის ქვეშ გადავიდა. განცხადება ამის შესახებ უკრაინის შს მინისტრის მოადგილემ ანტონ გერაშენკომ გააკეთა.
„დღეს მარიუპოლის ყველა ადმინისტრაციულ შენობაზე უკრაინის სახელმწიფო დროშას აღმართავენ. უპირველეს ყოვლისა ასეთი დროშა ქალაქის საბჭოს შენობაზე აღმართეს და ქალაქი ნორმალურ ცხოვრებას უბრუნდება",_ განაცხადა გერაშენკომ კიევში გამართულ პრესკონფერენციაზე.
მისივე თქმით, ადგილობრივი მცხოვრებლები უკრაინელი ძალოვნების ქმედებებს მხარს უჭერენ და ქალაქის გათავისუფლებას მიესალმებიან. გავრცელებული ინფორმაციით, უკრაინელმა ძალოვნებმა 11 ბოევიკი დააკავეს.
