უკრაინამ და რუსეთმა გაზის ფასზე უკვე მერამდენედ ვერ მოილაპარაკეს. კიევი კვლავ მოითხოვს სამართლიანი საბაზრო ფასის დაფიქსირებას.
„უკრაინას სურს სამართლიანი საბაზრო ფასი, რომლის ფორმირებაც საბაზრო მექანიზმებით ხდება და რომელიც დღეს ევროკავშირში მოქმედებს. სამწუხაროდ, რუსული მხარის მიერ შემოთავაზებული იყო ისეთი მექანიზმი, რომელსაც მე პოლიტიკურს ვუწოდებდი.
რუსეთი ე.წ. შეღავათის შემოთავაზებითაც გამოვიდა, ხოლო თუ როგორ მოქმედებს ეს „შეღავათი" ჩვენ უკვე ვნახეთ.... ასეთი მექანიზმი უკრაინული მხარისათვის მიუღებელია. ამიტომაც შეთანხმება სამწუხაროდ ვერ შედგა",_ განაცხადა ბრიუსელში უკრაინის ენერგეტიკის მინისტრმა იური პროდანმა.
მისივე თქმით, უკრაინას „არადისკრიმინაციული, სამართლიანი და არაპოლიტიკური" ფასის დამდგენი მექანიზმი სურს.
უკრაინელი მინისტრი ასევე აცხადებს, რომ ამის შემდეგ აღნიშნული სიტუაციის დარეგულირების ერთადერთი მექანიზმი სტოკჰოლმის საარბიტრაჟო სასამართლოდან მიღებული პასუხი იქნება.