ფრანგი აქტივისტები ახალი აქციისათვის ემზადებიან. აქცია სახელწოდებით „ანტი-მისტრალის მსოფლიო დღე" საფრანგეთის მიერ რუსეთისათვის „მისტრალის" ტიპის გემების მიყიდვის წინააღმდეგაა მიმართული. ფრანგი აქტივისტები პირობას დებენ, რომ „თბილ მიღებას" მოუწყობენ 400 რუს მეზღვაურს, რომლებიც საფრანგეთის დასავლეთ ნაწილში ქალაქ სენ-ნაზერში ავიამზიდების მართვის შესწავლისათვის უნდა ჩავიდნენ.
აქციის ერთ ერთი ორგანიზატორის ბერნარ გრიუას ინფორმაციით, აქცია 29 ივნისს გაიმართება.
„ჩვენ „თბილ მიღებას" მოვუწყობთ პუტინის 400 „მწვანე პატარა კაცუნას" რომლებიც აქ სწავლებებისათვის ჩამოვლენ. ჩვენ ავუხსნით მათ, რომ ბრეტანი (საფრანგეთის დასავლეთ რეგიონი) ყირიმი არ არის. ასევე ჩვენ უნდა ვუთხრათ ჩვენს მთავრობას, თუ რას ვფიქრობთ მათ აქტიურ თანამშრომლობაზე პუტინთან",_ განაცხადა მან.
ბერნარ გრიუას ინფორმაციით, ყველა მსურველი ჩავა იმ დღეს სენ ნაზერში და უკრაინის, საქართველოს, ბალტიისპირეთის, მოლდოვის, პოლონეთისა და სხვა ქვეყნების დროშების ქვეშ გაერთიანდება რომლებსაც „მისტრალი" ემუქრება. მათ შეეძლებათ სიტყვით გამოსვლა.
„ასე ჩვენ შევძლებთ არა მხოლოდ უკრაინელების მობილიზებას, არამედ მათ მობილიზებასაც, რომელთათვის ეს ყველაფერი სულერთი არ არის",_ განაცხადა ბერნარ გრიუამ.
მისივე თქმით, აქციისთვის მზადება სრული სვლით მიმდინარეობს. ხდება მობილიზება სოციალურ ქსელებში, იქმნება ჯგუფები, ხდება ტრანსპორტის ორგანიზება, მზადდება პლაკატები და სიმბოლიკა.
