ამერიკის შეერთებული შტატები საქართველოს მთავრობას გუანტანამოს ციხის ყოფილი პატიმრების საკუთარ ქვეყანაში მიღების გადაწყვეტილების გამო მადლობას უხდის.
ამის შესახებ სახელმწიფო მდივნის მოადგილე ფილიპ კროულიმ ვაშინგტონში გამართულ ბრიფინგზე ისაუბრა.
მისი თქმით, გუანტანამოს სამი პატიმრის საქართველოში გადაყვანის თაობაზე ქვეყნის შინაგან საქმეთა სამინისტრომ მზადყოფნა გამოთქვა, რასაც შეერთებული შტატები მიესალმება.
"მადლობას ვუხდით საქართველოს მთავრობას, რომ შეუერთდა ჩვენს ძალისხმევას გუანტანამოს საპყრობილის დახურვასთან დაკავშირებით. ჩვენი უახლოესი პარტნიორების, მათ შორის საქართველოს დახმარება ძალიან მნიშვნელოვანია", - განაცხადა ჰილარი კლინტონის მოადგილემ.
ამასთან, მისი თქმით, გუანტანამოს ციხეში ამ დროისთვის 183 პატიმარი რჩება. შეგახსენებთ, რომ ბარაკ ობამამ გუანტანამოს საპყრობილის დახურვის ბრძანებას ხელი ამერიკის შეერთებული შტატების პრეზიდენტად არჩევისთანავე მოაწერა.