სეპარატისტული აფხაზეთის ე. წ. პრემიერ-მინისტრი სერგეი შამბა აცხადებს, რომ აფხაზეთი დაინტერესებულია თავის მეზობლებთან _ რუსეთთან, ევროკავშირთან, თურქეთთან და საქართველოსთან კეთილმეზობლური ურთიერთობების დამყარებაში. ეს განცხადება შამბამ სოხუმში გამართულ პრესკონფერენციაზე გააკეთა.
პრიორიტეტულად შამბამ საგარეო პოლიტიკაში რუსეთის ფედერაცია დაასახელა, რომელთანაც მას "სტრატეგიული კავშირი" აქვს დამყარებული. შამბას თქმით, აფხაზეთის მეზობლები არიან ევროკავშირი, თურქეთი და საქართველო.
"ჩვენ უნდა ვეძებოთ ამ ქვეყნებთან თანამშრომლობის გზები. თურქეთი და ევროკავშირი აფხაზეთთან მიმართებაში დღეს ახალ სტრატეგიაზე გადავიდნენ, რომელსაც ასეთი ფორმულირება მივეცით _ აუღიარებლობა, მაგრამ ურთიერთობათა აქტიური განვითარება", _ განაცხადა შამბამ და აღნიშნა, რომ აფხაზეთი მართალია პატარა ქვეყანაა, მაგრამ რეგიონში მას სტრატეგიული მნიშვნელობა აქვს.
შამბა ასევე მნიშვნელოვნად მიიჩნევს აფხაზეთის გაწევრიანებას საკავშირო სახელმწიფოში, მაგრამ ამისთვის ბელორუსის მიერ აფხაზეთის აღიარებაა საჭირო.
"ჩვენ მოთმინებით უნდა დაჟინებით უნდა მოვითხოვოთ ბელორუსის მიერ აფხაზეთის დამოუკიდებლობის აღიარება და შემდგომ ეს პროცესი უკვე მიიღებს მომავალ მხარდაჭერას", _ განაცხადა შამბამ და დასძინა, რომ აფხაზეთის დამოუკიდებლობის აღიარების საკითხი ხანგრძლივი პროცესია და "აფხაზეთში ეს ყველას კარგად ესმის".
