გაიღვიძე, გესმის, გაიღვიძე! სანამ შენ გეძინა, დედამიწა ღერძიდან გადაიხარა... ჩილეში მიწისძვრა მოხდა... ამერიკას ქარიშხალმა გადაუარა... დედამიწის გადახრა მაინც როგორ ვერ იგრძენი, დედამიწაზე არ ხარ, არ დგახარ, თუნდაც არ გძინავს?!

მაგრამ შენც "გადახრილი" ხარ, ღერძიდან არა, საკუთარი თავიდან და ხერხემლიდან ხარ "გადახრილი"... თავჩაქინდრული და მხრებში მოხრილი რაღაცით შენი ქვეყნის რუკას ჰგავხარ _ დაჩიავებულსა და ემბრიონის პოზაში მობუზულს...

შენც ისევე ვერ იმორჩილებ საკუთარ სხეულს, როგორც შენი ქვეყანა საკუთარ ტერიტორიებს და ორივეც გაცილებით ადრე "გადაიხარეთ" საკუთარი თავიდან, თანაც უფსკრულისკენ, ვიდრე დედამიწა ღერძიდან, თანაც საკუთარ თავშივე!..

* * *
გაიღვიძე, გესმის გაიღვიძე! ქარიშხლის ხმა მაინც როგორ არ გაწუხებს?! ამერიკას ქარიშხალმა გადაუარა... ჩილეში მიწა იძრა... სომალელ ბავშვებს შიათ...

შენი წილი "მიწა" მაშინ "იძრა", როცა ბრმა ქალები "დაუკარით"-ს მღეროდნენ, თვალხილული ქართველი კაცები კი თავქუდმოგლეჯილები გარბოდნენ, ოღონდ "ელდანაცემი ძველი ხანჯლის" მოსატანად არა...

შენმა წილმა ქარიშხალმაც მაშინ გადაგიარა, როცა სოხუმი სისხლისგან იცლებოდა, ბათუმში კი _ საბრინა მღეროდა, ოღონდ "ბათუმს ქათქათას " არა...

შენს ბავშვებსაც იმ დროიდან შიათ, როცა მათ მამებს პურის რიგში ხოცავნენ და თავადაც პურის რიგში იბადებოდნენ...

ჰოდა, ამ ყველაფერზე შენ რა გაგაღვიძებს, როცა მაშინაც ვერ გაიღვიძე, როცა არც უნდა ჩაგძინებოდა!..

* * *
ხანდახან ისე უდარდელად გძინავს ვგონებ ცხადს სიზმრისგანაც ვეღარ ასხვავებ... იქნებ ფერადი სიზმარი რეალობა გგონია და მახინჯი რეალობა კოშმარული სიზმარი...

კარგა ხანია შენგან ოხვრაც კი აღარ გამოგონია, ლუარსაბივით ფშვინავ და გულაღმა ამობრუნებული ხვრივავ დროდადრო...

ნეტავ თართლი გესიზმრებოდა მაშინ, თუ ორაგული, როცა ქართველი ჯარისკაცები კოკოითის უჩოქებდნენ?! ან იქნებ იმას არკვევდი, მწვადი ხბოსი ჯობს, თუ ღორის სუკის, როცა ასობით ქართული სოფელი ცეცხლის ალში იყო გახვეული, ხოლო დანარჩენი საქართველო უცეცხლოდ იწვოდა? ალბათ, სიზმრად ჭერში ბუზებსაც სწორედ იმ დროს ითვლიდი, როცა ცხადში დაჭრილებსა და დახოცილ ჯარისკაცებს ითვლიდნენ და იმავე სიზმარში ტახტზე წამოგორებული ატალახებულ ეზო-კარსაც სწორედ მაშინ ათვალიერებდი თათქარიძისეული სიამაყით, როცა მთელი მსოფლიო ცხადში ხედავდა, შენი პრეზიდენტი ჰალსტუხს როგორ ღრნიდა და ღეჭავდა. ვიცი, შენს უდარდელ ძილს, მხოლოდ უშვილძიროდ დარჩენის დარდი რომ აფრთხობს და სხვა არაფერი, მაგრამ ცხადში დარჩენილების თანაგრძნობის იმედი მაინც ნუ გექნება... რომელი ილიას დამბადებელი შენ ხარ, ან შენ რა მოსაშენებელი იყავი...

გაჩენის დღიდან გაღვიძებენ და ვერ გაგიღვიძია...

* * *
ჯადოსნური ბალახი კი არ გვაქვს, სახეზე ერთი გადასმით რომ გავაგაღვიძოთ...
სიტყვა და მუდარა არ გესმის, მუჯლუგუნსა და პანჩურის ამორტყმას ვერ გრძნობ და სულში ჩაფურთხებას როგორღა იგრძნობ, თუკი სული აღარ გაქვთ... და მაინც... გაიღვიძე, გესმის, გაიღვიძე! ნახე ირგვლივ რამდენი უფასო სანახაობაა... ამდენს შენი ყველაზე "მძაფრსიუჟეტიანი" სიზმარიც კი ვერ შემოგთავაზებს _ ყოველი დილა ახალ- ახალი, ცხელ-ცხელი ამბებითა და ცივ-ცივი გვამებით იწყება... ვიღაცას კლავენ, ვიღაც თავს იკლავს... შუაღამემდე შეგიძლია უყურო, საათში ერთხელ... ძილილამდე ზეპირად გეცოდინება და სიზმარსაც "შპარგალკა" აღარ დაჭირდება...

თუ ერთ დღეს მოხდა "გამონაკლისი" _ ვიღაცას "დაეზარა" ვიღაცის მოკვლა, ან თვითმკველობა "გადადო" დროებით _ შენ ნუ მოიწყენ... "ქათმის გრიპი" ჩამოივლის, ან "ღორის გრიპი"... სულ მცირე, იმ დღეს ქარიშხალი მაინც ამოვარდება... წინა დღეს გაგაფრთხილებენ, რომ "შინიდან გასვლისგან თავი შეიკავო"... და შენც მთელ დღეს ჩარაზულ სარკმელთან გაატარებ: ანც სიოში გამძვინვარებულ ქარიშხალს დაინახავ, კაშკაშა მზეში _ მთვარის დაბნელებას და ამინდის პროგნოზთან "შეუთანხმებლად" მომაკვდავ მეზობელთან წნევის გასაზომად კი არა, საკუთარ საპირფარეშოშიც ვერ შეხვალ ფიზიოლოგიური მოთხოვნილებისთვის...

ასეთ ხალხს შეძახილზე არა, მხოლოდ მაღვიძარას ხმაზე ეღვიძებათ, ხოდა გაიღვიძეთ რა...                                                                    გაიღვიძეთ, რადგან თქვენს მაღვიძარასაც თავად "ჩასძინებია"!

* * *
გაიღვიძე, გესმის... გაიღვიძე! ნახე რა საამურია ცხოვრება... სანამ შენ გეძინა, ცათამბჯენები აშენდა, უცხოელი ინვესტორები ჩემოვიდნენ, პენსიები გაიზარდა, კონვენციები დაიწერა, კანონები შეიცვალა, ევროპამ თავის განუყოფელ ნაწილადაც გვცნო და ჰა და ჰა "ნატოშიც" მიგვიღებენ...

გაიღვიძე რა... გაიღვიძე, თორემ ყველა მატარებელმა გაგასწრო უკვე! პრეზიდენტის "მატარებელს" ვეღარ აახტები, ვერც სოხუმისას... სანამ შენ გეძინა, ორივე დაიძრა და ორივე "დეპოში" დგას უკვე!..

ამასობაში ქვეყანა აირია, დაირია და დალაგდა... რაც მსოფლიოში სასწაულები მომხდარა, ყველა საქართველოში ხდება _ აქ, ამჟამად და თანაც პირველად!

მარტო შენი ძილქუშია დაძველებული და გაიღვიძე, თუ ღმერთი გწამს, რა დროს სიზმრად ბოზბაშის თქვლეფაა, როცა ცხადში უფასო სასადილოები გაიხსნა და მოდაში სუშის ჭამა შემოვიდა...

გაიღვიძე, თორემ უშენოდ "აშენდა" ეს ქვეყანა...

"ვიღაცებს" რუსეთისკენ გაექცათ თვალი... ვიღაცას ცალი წინდა, ვიღაცას ქოში დარჩა კრემლის კიბეებზე... მეორე "ცალს" თეთრის სახლის მიმდებარე ტერიტორიაზე ეძებენ... გაფრინდებიან, გადმოფრინდებიან, "დააწყვილებენ "და ჩამოვლენ... მერე ჩვენ "ავირჩევთ"...

ჰოდა, ამ სანახაობას მძინარე როგორ უნდა შეხვდე, გაიღვიძე რა... გაიღვიძე... იქნებ მორიგ ვირტუალურ მატარებელს მაინც მიუსწრო...

* * *
გაიღვიძე... გესმის, გაიღვიძე!.. მძინარე "გმირებს" ღირსების ორდენს არ ურიგებენ, არადა რამდენი დარიგდა რომ იცოდე... ერთბაშად რომ დაინახო, სათვალავი აგერევა და შეიძლება გულიც გაგისკდეს! სანამ შენ გეძინა, ნახევერი საქართველო უცხოეთში გაიხიზნა... დარჩენილების ნახევარი დეპრესიაშია, მეორე ნახევარი ნახევრად გაიყო და სამსახურს ეძებს, იმ ნახევრის ნახევარი სერიალებს უყურებს, მესამდი შოუებს, მეოთხედი "ფეისბუკით" ცხოვრობს, მეოთხდეთს "ოდნოებით" უდგას სული, მეექვსედი მიტინგზე დადის... მეორე ნახევრის ნახევარი ნარკომანობს, მესამდი პროსტიტუციას არჩევს, მეოთხედი ჯადოს კეთებას... მოკლედ გაიღვიძე რა, არჩევანი დიდია...

იცი რამდენ ჭორს გაიგებ... შენი ცხოვრება რომც არ გქონდეს სხვისი ცხოვრებითაც იცხოვრებ... ანონიმურ ზარებს გააკეთებ, პრესას წაიკითხავ, ტელევიზორს უყურებ, მეზობლის კედელს ყურს მიადებ...

ჰო, მართლა გაიღვიძე რა... იქნებ კენჭიც იყარო, დაძინებულთა მერობის კანდიდატი იქნები, მგონი ჯერ არ ჰყავთ...

* * *
გაიღვიძე, გესმის გაიღვიძე!.. სანამ შენ გეძინა ჩილეში მიწისძვრა მოხდა... ამერიკას ქარიშხალმა გადაუარა... საქართველოში ომი "დაიწყო"!
იმიტირებულ ომს იმიტირებული მშვიდობა მოჰყვა, ოღონდ იმ განსხვავებით, რომ იმიტირებული მშვიდობისთვის ბოდიშსაც არავინ გვიხდის; პირიქით, გავყვედრიან და გვამადლიან... და ჩვენც ვირგებთ, მთლად დედის რძესავით არა, მაგრამ მაინც...

რით ვერ გაიღვიძე ამდენი ქართველის შეძახილზე?! რუსებს რაგბში მოვუგეთ! იცი, ეს რა თამაში იყო? ღირსებისა და პრესტიჟის... ეს რევანში იყო!

ბრძოლით წაგებულზე თამაშით რევანში! მერე რა, რომ რუსებს ვერც რეალური და ვერც ვირტუალური ომი ვერ მოვუგეთ... მერე რა, რომ ასობით სოფელი და ათასობით ჯარისკაცი დავკარგეთ, მერე რა რომ ჩვენი პრეზიდენტი მიწაზე დახოხავდა ომში... რაგბი რომ მოვიგეთ, იმ დღეს ხომ დახტუნავდა ცაში...

ჰოდა, გაიღვიძე რა... ამაზე კომიკურს და ამაზე ტრაგიკულს სიზმარში რას ხედავ... გაიღვიძე რა, სომალელ ბავშვებს შიათ და იქნებ "იავნანამ რა ჰქნა" მოუყვე...

* * *
გაიღვიძე, გესმის, გაიღვიძე! სანამ შენ გეძინა დედამიწა ღერძიდან გადაიხარა... დედამიწის გადახრა მაინც როგორ ვერ იგრძენი, დედამიწაზე არ ხარ, არ დგახარ, თუნდაც არ გძინავს?..

მაგრამ შენც "გადახრილი" ხარ, ღერძიდან არა, საკუთარი თავიდან და ხერხემლიდან ხარ "გადახრილი"...

თავჩაქინდრული და მხრებში მოხრილი რაღაცით შენი ქვეყნის რუკას ჰგავხარ _ დაჩიავებულსა და ემბრიონის პოზაში მობუზულს...

...და ვინ იცის, იქნებ სხვებსაც მხოლოდ იმიტომ აღვიძებ, გეშინია, თავადაც არ ჩაგეძინოს ამასობაში...

პ.ს. უკაცრავად, თქვენი გაღვიძება რომ ვცადე...
მაპატიეთ, რომ ვერ გაგაღვიძეთ...

"ჯი-ეიჩ-ენი", ელგა ფოლადიშვილი