დღეიდან, 22 მარტიდან, პარიზის სასამართლო საზოგადოებრივი მაუწყებლისა და ფრანგული სატელიტური კომპანიის დავის განხილვას იწყებს.
როგორც საზოგადოებრივ მაუწყებელში აცხადებენ, პროცესისთვის ქართულ მხარეს ყველაფერი მზად აქვს და სასამართლოს ობიექტურობის შემთხვევაში, პროცესსაც მოიგებენ.
ქართულმა მხარემ ფრანგული სატელიტური ოპერატორის წინააღმდეგ სარჩელი თებერვლის დასაწყისში შეიტანა. ამის მიზეზი კი რუსულენოვანი არხის "პირველი კავკასიურის" სატელიტური მაუწყებლობიდან გათიშვა გახდა.
ფრანგულმა კომპანიამ "პირველ კავკასიურს" სატელიტით მაუწყებლობა 28 იანვარს შეუწყვიტა და სანაცვლოდ ისეთი სიხშირე შესთავაზა, რომლითც "პირველი კავკასიური" რუსეთის ფედერაციაში მაუწყებლობას ვერ შეძლებს. ამის გამო, საზოგადოებრივმა მაუწყებელმა ფრანგული კომპანიის წინააღმდეგ პარიზის სასამართლოს მიმართა.
