საქართველოში საციგაო სპორტის საერთაშორისო ფედერაციისა და ევროპის ოლიმპიური კომიტეტის პრეზიდენტები, ასევე 2010 წლის ოლიმპიადის მთავარი მმართველი ჩამოდის.
ისინი ტრაგიკულად დაღუპული ქართველი მოციგავის, ნოდარ ქუმარიტაშვილის ხსოვნისადმი მიძღვნილ ცერემონიაში მიიღებენ მონაწილეობას, რომელიც ხვალ, 23 მარტს გაიმართება.
მათთან ერთად თბილისს ოლიმპიური თამაშების საორგანიზაციო კომიტეტის ვიცე-პრეზიდენტიც ეწვევა, რომელიც ქუმარიტაშვილის მშობლებს თანაგრძნობის წიგნს გადასცემს.
ხვალ, 23 მარტს, ნოდარ ქუმარიტაშვილის გარდაცვალებიდან 40 დღე სრულდება. ბაკურიანში ჩასვლას და გარდაცვლილი სპორტსმენის ხსოვნისადმი პატივის მიგებას აპირებენ სპორტის ამ სახეობის ეროვნულ ფედერაციის ხელმძღვანელები ავსტრიიდან, ლატვიიდან და უკრაინიდან.
ნოდარ ქუმარიტაშვილი 12 თებერვალს, ვანკუვერის ზამთრის ოლიმპიადის გახსნის საზეიმო ცერემონიამდე რამდენიმე საათით ადრე, სავარჯიშო დაშვების დროს გარდაიცვალა.
