კანონპროექტი, რომელიც აღნიშნულ ცვლილებებს ითვალისწინებს, პარლამენტარებმა: გია ჟორჟოლიანმა, ნუკრი ქანთარიამ, ირაკლი ჩიქოვანმა და ზვიად კვაჭანტირაძემ მოამზადეს.

ცვლილებების თანახმად, დღემდე მოქმედი სამეურვეო საბჭოს წევრებს იმგვარი ფუნქციები მიეცემათ, რომელიც ერთი მხრივ, საზოგადოებრივ მაუწყებელს დაიცავს მათი მხრიდან მორიგი კანონსაწინააღმდეგო და დაუსაბუთებელი გადაწყვეტილებების მიღებისგან და მეორე მხრივ, უზრუნველყოფს ახალი სამეურვეო საბჭოსა და გენერალური დირექტორის საქმიანობაზე ეფექტურ შიდა მონიტორინგს და საზოგადოების დროულ ინფორმირებას ფინანსურ, საკადრო და სხვა პრობლემებზე.
საპარლამენტო უმრავლესობის წევრის, ელისო ჩაფიძის განმარტებით, მონიტორინგის საბჭოს მნიშვნელოვანი ფუქნციები დაეკისრება და მთლიანდ საზოგადოებრივ მაუწყებელს გაუწევს მონიტორინგს.
"სამეთვალყურეო საბჭო ხდება ორ პალატიანი. მნიშვნელოვანია, რომ მონიტორინგის საბჭოს საკამოდ სერიოზული უფლებები აქვს მინიჭებული. მას შეუძლია ბიუჯეტთან დაკავშირებით ნებისმიერი ინფორმაცია გამოითხოვოს, ასევე აქვს უფლება დააყენოს გენერალური დირექტორის პასუხისმგებლობის საკითხიც. მონიტორინგის საბჭოს წევრთა ანაზღაურება იქნება სამეურვეო საბჭოს წევრის ანაზღაურების 80 %. საკმოდ ბევრი რეგულაცია დევს ამ კანონპროექტში, თუმცა, მე პირადად არ მინდა, რომ ამ გადაწყვეტილებას დავეთანხმო",-აცხადებს ჟურნალისტებთან ელისო ჩაფიძე.

პარლამენტს ამ დროისთვის არჩეული ჰყავს სამეურვეო საბჭოს შვიდი წევრი. ვაკანტურად რჩება ორი ადგილი, რადგან უმრავლესობამ უმცირესობის მიერ წარდგენილ კანდიდატებს მხარი არ დაუჭირა.