დღეს, 23 აპრილს, საქართველოში წიგნის დღე აღინიშნება. დამკვიდრებული ტრადიციის მიხედვით, ყოველი წლის 23 აპრილს მკითხველი სასურველი წიგნის შეძენას არსებულთან შედარებით დაბალ ფასად შეძლებს.
წიგნის დღესთან დაკავშირებით რუსთაველის თეატრში გამოფენა-გაყიდვა გაიმართება, რომელიც 11:00 საათიდან დაიწყება და 20:00 საათამდე გაგრძელდება.
გამოფენაში მონაწილეობას საქართველოში არსებული სხვადასხვა წიგნის გამომცემლები და გამავრცელებლებიც მიიღებენ. ღონისძიებები საქართველოს წიგნის გამომცემელთა და გამავრცელებელთა ასოციაციის ორგანიზებითა და თბილისის მერიისა და საქართველოს კულტურისა და ძეგლთა დაცვის სამინისტროს მხარდაჭერით ხორციელდება.
"წიგნი ცოდნის გავრცელების ყველაზე ხელმისაწვდომი და მისი შენახვის საუკეთესო საშუალებაა. ამ დღეს წიგნების გამოფენა-გაყიდვების მოწყობის ეფექტურობა იუნესკოს რეზოლუციაშია აღნიშნული", - აცხადებს საქართველოს გამომცემელთა და წიგნის გამავრცელებელთა ასოციაციის თავმჯდომარე ქეთევან კიღურაძე.
23 აპრილი, „წიგნის დღედ" 2012 წელს საქართველოს კულტურისა და ძეგლთა დაცვის მაშინდელი მინისტრის, ნიკოლოზ რურუას ინიციატივით გამოცხადდა.