დღეს, თბილისის იუსტიციის სახლში, საჯარო რეესტრის ეროვნული სააგენტოს ინციატივით „დედამიწის დღის" აღსანიშნავი გამოფენა გაიხსნა.
გამოფენაზე სააგენტოს თანამშრომელთა შვილების ნამუშევრები იყო წარმოდგენილი.
ღონისძიებაში 53 ბავშვი მონაწილეობდა. სპეციალურად ამ დღისთვის პატარებმა გარემოს დაცვის თემაზე საინტერესო ნამუშევრები შექმნეს, რომლებიც სააგენტოს facebook -ის ოფიციალურ გვერდზე აიტვირთება.
როგორც სააგენტოს თავმჯდომარემ პაპუნა უგრეხელიძემ აღნიშნა: „ საჯარო რეესტრის თანამშრომლები ყოველთვის აქტიურად მონაწილეობენ გარემოსდაცვით ღონისძიებებში. დღეს, ამ აქციით ვეცადეთ მშობლები და შვილები კიდევ ერთხელ, ერთად დავფიქრებულიყავით, თუ რაოდენ მნიშვნელოვანია იმ გარემოზე ზრუნვა, სადაც ვცხოვრობთ, ვმუშაობთ. ამ გამოფენით გვინდა ავამაღლოთ პატარების ცნობიერება გარემოსდაცვით საკითხებში. გვინდა ჩვენმა მომავალმა თაობებმა ბავშვობიდანვე გააცნობიერონ დედამიწის და ბუნების მნიშვნელობა და სიყვარული".
გამოფენის დასასრულს პატარებს სპეციალურ სიგელებთან ერთად, სიმბოლური საჩუქრების სახით ის წიგნებიც გადაეცათ, რომლებიც, „მედია პალიტრის" პროექტის - "გაცვალე მაკულატურა ლიტერატურაზე" ფარგლებში, ნარჩენი ქაღალდის ჩაბარების სანაცვლოდ მიიღეს სააგენტოს თანამშრომლებმა.
დედამიწის დღე პირველად 1970 წელს აღინიშნა. ეს დღე მას შემდეგ დაარსდა, რაც სანტა ბარბარას საბადოდან ნავთობი დაიღვარა, რამაც ოკეანის დაბინძურება და წყლის ბინადართა განადგურება გამოიწვია. ყოველი წლის 22 აპრილს, სახვადასხვა ღონისძიებაში 190-ზე მეტი ქვეყნის20 ათასამდე ორგანიზაცია და მილიონობით მოხალისე, დედამიწაზე საკუთარი გარემოს გაუმჯობესების მიზნით მონაწილეობს.
საქართველოში „დედამიწის დღე" პირველად 1990 წელს აღინიშნა და მას შემდეგ ყოველწლიურად ამ ღონისძიებას მრავალი ორგანიზაცია და მოხალისე უერთდება.