საქართველოს ვიცე-პრემიერ მინისტრ გიორგი ბარამიძის აზრით, მოსკოვი შეეცდება ქართული პროდუქციის რუსულ ბაზარზე შესაძლო დაბრუნებას პოლიტიკური სარჩული მოუძებნოს.
"მოსკოვი საგონებელშია იმის გამო, რომ რუსეთ-ბელორუს-ყაზახეთის საბაჟო კავშირის ამოქმედების შემდეგ, როგორც ერთიან ეკონომიკურ სივრცეში, ბელორუსიდან და ყაზახეთიდან ქართული პროდუქციის რუსეთის ბაზარზე დაბრუნებას ხელს არაფერი შეუშლის. რუსეთის ხელისუფლებაში ახლა ფიქრობენ, პოლიტიკურად რა სარჩული დაუდონ ამ ყველაფერს", - განუცხადა ბარამიძემ აღნიშნულ საკითხზე კომენტირებისას ჟურნალისტებს.
მისივე განმარტებით, არ არის გამორიცხული, რუსეთმა საკითხის პოლიტიზირებისას ისიც განაცხადოს, თითქოს ქართული პროდუქციის რუსულ ბაზარზე დაბრუნება "ზურაბ ნოღაიდელის და ნინო ბურჯანაძის დამსახურებაა".
"ჩვენი პროდუქცია აუცილებლად შეაღწევს რუსეთის ბაზარზე და ეს მაშინვე მოხდება, როგორც კი ბელორუსთან და ყაზახეთთან საბაჟო კავშირს შექმნის. ამას წინ ვერაფერი დაუდგება, თუმცა მინდა ქართველი მეწარმეები მაინც გავაფრთხილო, რომ რუსულ ბაზარზე დაბრუნება ზედმეტად არ გამოიყენონ - ბაზრების დივერსიფიცირება მოახდინონ და მხოლოდ რუსულზე არ იყვნენ დამოკიდებულნი, რადგან არ არის გამორიცხული მოსკოვმა მისი ხელოვნურად დაბლოკვა ისევ მოახდინოს", - განმარტავს ბარამიძე.
