უკვე მიმდინარე წელს რუსეთში შესაძლოა ქართული მინერალური წყლები დაბრუნდეს. აღნიშნული დაკავშირებულია იმასთან, რომ 1 ივლისიდან საბაჟო კავშირის მოქმედების ნორმები ძალაში შედის. ინფორმაციას ამის შესახებ გაზეთი "კომერსანტი" ავრცელებს. მრეწველობისა და ვაჭრობის მინისტრის მოადგილის ვალდიმერ სალამატოვის ინფორმაციით, 1 ივლისის შემდეგ რუსეთის ტერიტორიაზე ცალკეული პროდუქციის მიმოქცევის აკრძალვის რეჟიმი შეიცვლება. ამის შემდეგ სიტუაციის კონტროლი "როსპოტრებნადზორს" აღარ შეეძლება. გამონაკლისი მხოლოდ იმ პროდუქციისათვის იქნება დაშვებული, რომელთა აკრძალვაც მეცნიერული თვალსაზრისით ახსნადია და მოსახლეობისათვის დიდ საფრთხეს წარმოადგენს.
თეორიულად ქართული ღვინოების დაბრუნება რუსეთში საბაჟო კავშირის ფარგლებშიც შეიძლება, მაგრამ ამისათვის საჭიროა ბელორუსისა და ყაზახეთის თანხმობა არ იყიდონ ეს პროდუქცია. თუმცა მინსკსა და ასტანას ამგვარი შეზღუდვები არ შემოუღიათ _ იქ ქართული პროდუქცია თავისუფლად იყიდება.
რუსეთს შეუძლია ქართული იმ ღვინოების შეტანის ბლოკირება მოახდინოს, რომელთა შეტანა საზღვაო ტრანსპორტით მოხდება. თუმცა, თუკი ამ პროდუქციის განბაჟება ბელორუსში მოხდება, მისთვის რუსეთში მოხვედრას ხელს ვეღარაფერი შეუშლის.
საქართველოში რუსული ბაზრის გახსნის საკითხი ჯერ არ განიხილება. "ჩვენ ვაგზავნით პროდუქციას ბელორუსსა და ყაზახეთში. მისი რუსეთში შეტანის საკითხი კი ამ ქვეყნების ტერიტორიებს გავლით საბაჟო კავშირის ფარგლებში ჩვენს მიერ არ განხილულა. ამჟამად ჩვენ კონცენტრირებულნი ვართ ჩვენი სხვა საკვანძო ბაზრების განვითარებით", _ აცხადებს კომპანია "ბორჯომის" ვიცე-პრეზიდენტი ლევან ბაღდავაძე.
