უფრო კომპეტენტური კადრია საჭირო სამოქალაქო რეესტრის სამართავად, - განაცხადა სერვისების განვითარების სააგენტოს თავმჯდომარემ იოსებ ბაღათურიამ სახელმწიფო სერვისების განვითარების სააგენტოს თავმჯდომარის მოადგილის ნოდარ ყანჩაველის მიერ თანამდებობის დატოვების კომენტირებისას.
"მე დავინიშნე ორი დღის წინ. ჩავიხედე და ვნახე, რომ ყანჩაველი, ადეიშვილის დავალებით კახეთის აღორძინებაზე მუშაობდა და მაინცდამაინც არ აინტერესებდა სამოქალაქო რეესტრი. ეს არ იყო მისი პრიორიტეტი. ვფიქრობ, უფრო კომპეტენტური კადრია საჭირო სამოქალაქო რეესტრის სამართავად. როგორც ჩანს მან ეს იგრძნო ჩემგან, გაღიზიანდა და ამიტომაც გააკეთა ეს განცხადება. სერვისების განვითარების სააგენტო და იუსტიციის მინისტრთან მუშაობა რომ სასურველია, იმიტომაც წამოვედი მე სასამართლოდან ორი დღის წინ და დავუდექი მას გვერდში. ნოდარ ყანჩაველის მსგავსი კადრის წასვლით ჩვენს მუშაობას არაფერი დააკლდება. მე მისი განცხადება უკვე დავაკმაყოფილე", - განაცხადა ბაღათურიამ.
შეგახსენებთ, რომ ნოდარ ყანჩაველმა სახელმწიფო სერვისების განვითარების სააგენტოს თავმჯდომარის მოადგილის თანამდებობა დატოვა. მისი თქმით, გადაწყვეტილების მიღების მიზეზი იუსტიციის მინისტრის არაკვალიფიციურობაა.
