ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი ალექსი პეტრიაშვილი მიიჩნევს, რომ უნდა დაჩქარდეს საქართველოს ნატოში გაწევრიანება და ევროკავშირის წევრობის პერსპექტივის გახსნის პროცესი. ამის შესახებ, პეტრიაშვილმა ბელგიაში, ქ.ბრუსელში გამართული შეხვედრების შემდეგ განაცახდა.
,,ჩვენი მოთხოვნაა, რომ დაჩქარდეს საქართველოს ნატოში გაწევრიანების პროცესი, დაჩქარდეს საქართველოსთვის ევროკავშირის წევრობის პერსპექტივის გახსნის პროცესი და ვიმედოვნებთ, რომ უახლოეს მომავალში ჩვენ ამ ორგანიზაციებში ჩვენ საყოველთაო მხარდაჭერას მივაღწევთ და იქნება შესაბამისი გადაწყვეტილებები მიღებული"-განაცხადა პეტრიაშვილმა.
მარშალის ფონდის(GMF) მიერ ორგანიზებულ ბრუსელის ფორუმის ფარგლებში სახელმწიფო მინისტრმა სამუშაო შეხვედრები გერმანიის საგარეო საქმეთა სამინისტროს პოლიტიკის დეპარტამენტის დირექტორთნ თომას ბაგერთან, ლატვიის საგარეო საქმეთა მინისტრ ედგარ რინკევიჩსთან და ბრიტანეთის საგარეო საქმეთა სახელმწიფო მდივანთან საიმონ ფრაიზერთან გამართა.
შეხვედრებზე მხარეებმა საქართველოს ევროპული და ევროატლანტიკური პერსპექტივები განიხილეს.
ალექსი პეტრიაშვილმა განსაკუთრებული ყურადღება გაამახვილა საქართველოს ევროკავშირსა და ნატოში გაწევრიანების პროცესის დაჩქარების აუცილებლობაზე. ამ კუთხით, ხაზი გაესვა ევროკავშირის გადაწყვეტილებას საქართველოსთან ასოცირებისა და მისივე შემადგენელი ღრმა და ყოვლისმომცველი სავაჭრო სივრცის შესახებ შეთანხმებების ხელმოწერის დაჩქარების შესახებ მიღებული გადაწყვეტილებისა და მიმდინარე წლის სექტემბერში დიდ ბრიტანეთში, უელსში დაგეგმილ ნატოს სამიტზე საქართველოსთან დაკავშირებით გადაწყვეტილებების მიღების მნიშვნელობას.
შეხვედრებზე განსაკუთრებული ყურადღება დაეთმო უკრაინაში განვითარებულ მოვლენებსა და აღმოსავლეთ პარტნიორობის მონაწილე ქვეყნების წინაშე არსებულ გამოწვევებს.
სახელმწიფო მინისტრის აპარატის ინფორმაციით, შეხვედრებზე აღინიშნა, რომ, როგორც ჩრდილოატლანტიკურ ალიანსში, ისე ევროკავშირში მიმდინარეობს ინტენსიური მსჯელობა ამ მიმართულებით დამატებითი ნაბიჯების გადასადგმელად.
ბრიუსელის ფორუმი დღეს დაიხურება.
