ყოფილი საგარეო საქმეთა მინისტრი სალომე ზურაბიშვილი სოციალურ ქსელში ყოფილ პრემიერსა და პრეზიდენტს შორის არსებულ ურთიერთობას აფასებს და აცხადებს, რომ უმჯობესი იქნებოდა, თუ ისინი ,,შიდა სამზარეულოს" საჯაროს არ გახდიდნენ.
ძალიან უცნაური სიტუაცია შეიქმნა... გასულ კვირას ჩემს ინტერვიუებში დავიცავი "სახელმწიფოებრივი " პოზიცია (და რომ ჩემი პოზიცია სრულიად ნათელი იყოს, იმასაც უთუოდ უნდა ხაზი გავუსვა რომ არაფერი ვიცოდი შიდა უთანხმოებების შესახებ): არჩეული პრეზიდენტი უნდა იყოს პატივცემული საზოგადოების და მთავრობის მიერ და მაგალითად მის პარლამენტის წინაშე გამოსვლას მთავრობის პირები უნდა ესწრებოდნენ.... ის აზრიც გამოვთქვი, რომ პრეზიდენტი და მთავრობა სასახლეში უნდა გადასულიყვნენ რამეთუ სახელმწიფოს არ ეკადრება საპრეზიდენტო სასახლე ჰქონდეს - რომელზედაც ამდენი ქვეყნის და უცხოეთის ფული დაიხარჯა - და იგი ცარიელი და მიტოვებული იყოს.... მე არ ვიცი და ნაკლებად მაინტერესებს მარგველაშვილის ხასიათი მაგრამ დღევანდელ დღეს , და იმ დროს როცა ჩვენ საზღვრებთან რუსეთი მეზობელ ქვეყანას თავს ესხმება და მის ტერიტორიულ მთლიანობას უტევს, კიდევ უფრო მნიშვნელოვნად მიმაჩნია რომ სახელმწიფო და მისი სიმბოლიკა (მათ შორის პრეზიდენტი თუნდაც უფლებადაცლილი) კი არ დავასუსტოთ, შიდა და გარე მაყურებლის თვალში, არამედ გავაძლიეროთ და გავიტანოთ პირიქით შეკრული და ძლიერი ერის სურათი . მაშ და თუ არაფერი "მნიშვნელოვანი არ მომხდარა", ალბათ, სჯობდა საჯაროდ ამ "შიდა სამზარეულოს" არ გამოტანა... ჩვენს გვერდით ტრაგიკული მოვლენები ვითარდება და ჩვენ მივყვებით ხასიათს, პირად წყენას, პიროვნულ იმედგაცრუებას .... სახელმწიფო ერთი გვაქვს და მას სჭირდება გაფრთხილება, მოვლა და გამაგრება!", _აცხადებს ზურაბიშვილი.
