დიდ ბრიტანეთში საქართველოს უწყებათაშორისი დელეგაციის ვიზიტის ფარგლებში, გაერთიანებული სამეფოს საერთაშორისო ურთიერთობების სამეფო ინტიტუტში Chatham House გაიმართა ექსპერტთა მრგვალი მაგიდა თემაზე "საქართველოს საგარეო პოლიტიკა ახალ რეალობაში".
ღონისძიებაზე სიტყვით გამოვიდა საქართველოს საგარეო საქმეთა მინისტრის პირველი მოადგილე დავით ზალკალიანი.
საგარეო საქმეთა სამინისტროს ინფორმაციით, ღონისძიებას ესწრებოდნენ გაერთიანებულ სამეფოში აკრედიტებული დიპლომატიური კორპუსისა და სამეცნიერო კვლევითი ინსტიტუტების წარმომადგენლები.
მოხსენებისა და შემდგომი დისკუსიის ფარგლებში დავით ზალკალიანმა ისაუბრა საქართველოსათვის ყველა მნიშვნელოვან საკითხზე. კერძოდ, დამსწრე საზოგადოებას მიაწოდა ინფორმაცია საქართველოში არსებული შიდაპოლიტიკური მდგომარეობისა და საგარეო პოლიტიკის ძირითადი მიმართულებების - საქართველოს ევროკავშირთან და ნატოსთან არსებული ურთიერთობებისა და სამომავლო თანამშრომლობის პერსპექტივების შესახებ.
ღონისძიების ფარგლებში, აგრეთვე განხილული იქნა ვითარება საქართველოს ოკუპირებულ რეგიონებში, საქართველო-რუსეთის ურთიერთობები, ჟენევის მოლაპარაკებათა მიმდინარეობა და საქართველოსათვის სხვა აქტუალური და მნიშვნელოვანი საკითხები. საუბარი ასევე შეეხო საქართველოს რეგიონული თანამშრომლობის ასპექტებსა და საერთაშორისო მნიშვნელობის თემებს. ყურადღება დაეთმო აგრეთვე უკრაინაში მიმდინარე მოვლენებს. განხილული იქნა ამჟამად შექმნილი ვითარება, მოვლენათა განვითარების შესაძლო სცენარები და ასევე, რა გავლენა შეიძლება იქონიოს უკრაინის მოვლენებმა საქართველოზე, რეგიონზე, საერთაშორისო სამართალსა და წესრიგზე.
