მოძრაობა "სამართლიანი საქართველოსთვის" ინფორმაციით, ყვარლის რაიონის გამგებელი საბიუჯეტო ორგანიზაციების ხელმძღვანელებს ადგილობრივ არჩევნებში "ნაციონალური მოძრაობის" მხარდაჭერას ავალდებულებს.
როგორც ნოღაიდელის პარტიის ყვარლის რაიონული ორგანიზაციის ხელმძღვანელი დავით ტოჩილაშვილი აცხადებს, გამგებელმა ლევან გამსახურდიამ აღნიშნულთან დაკავშირებით ყველა საბიუჯეტო ორგანიზაციის ხელმძღვანელს შესაბამისი დაველება უკვე მისცა.
"გამგებელმა მოითხოვა, რომ მისი დავალება ყველა ქვედა რგოლამდე, თითოეულ რიგით თანამშრომლამდე დაიყვანონ. დავალების შეუსრულებლობის შემთხვევაში, ლევან გამსახურდია საბიუჯეტო ორგანიზაციების ხელმძღვანელებს სამსახურებიდან გათავისუფლებით დაემუქრა",- აცხადებს ტოჩილაშვილი.
ამასთან, მოძრაობა "სამართლიანი საქართველოსთვის" მტკიცებით, აღნიშნულის პარალელურად ხელისუფლების ინიციატივით, ყვარლის რაიონში ჩამოყალიბდა "პენსიონერთა კავშირი", რომლის წევრებსაც ადგილობრივი ხელისუფლება "ნაციონალური მოძრაობის" მხარდაჭერის სანაცვლოდ, სხვადასხვა სახის სოციალურ დახმარებებს ჰპირდება.
