დღეს, 18 მარტს, აშშ-ის სახელმწიფო მდივანი ჰილარი კლინტონი მოსკოვს ეწვევა.
სახელმწიფო დეპარტამენტის ინფორმაციით, რუსეთში ვიზიტის ფარგლებში კლინტონი რუსეთის საგარეო საქმეთა მინისტრ სერგეი ლავროვთან, გაეროს გენერალურ მდივან პან კი მუნთან და ევროკავშირის უმაღლეს წარმომადგენელ ქეთრინ აშტონთან კვარტეტის სახელით ცნობილ ისრაელ-პალესტინის კონფლიქტის მოგვარების საშუამავლო ჯგუფის - შეხვედრაში მიიღებს მონაწილეობას, რომელიც ახლო აღმოსავლეთში მშვიდობის ხელშეწყობას და მასთან დაკავშირებულ საკითხებს მიეძღვნება.
შეხვედრას კვარტეტის წარმომადგენლის სტატუსით დაესწრება ტონი ბლერი.
ოფიციალური ინფორმაციით, კლინტონი რუსეთის დედაქალაქში ორი დღე დარჩება. ხვალ, 19 მარტს აშშ-ის სახელმწიფო მდივანი უკვე ფედერაციის ოფიციალურ პირებს შეხვდება.
შეგახსენებთ, რომ ე.წ. კვარტეტის შემადგენლობაში აშშ, გაერო, ევროკავშირი და რუსეთი შედიან.
