25 თებერვალს, სახელმწიფო აუდიტის სამსახურის გენერალურმა აუდიტორმა ლაშა თორდიამ არასამთავრობო ორგანიზაციების წარმომადგენლებთან შეხვედრა გამართა. შეხვედრაზე განხილულ იქნა 2014 წლის ადგილობრივი თვითმმართველობის არჩევნებისათვის წინასაარჩევნო კამპანიის რეგულირების საკითხები და გენერალური აუდიტორის ინიციატივა პოლიტიკური დაფინანსების კანონიერებასა და გამჭვირვალობაზე მონიტორინგის საკითხებზე მომუშავე დროებითი კომისიის შექმნის შესახებ. შეხვედრის შედეგად გადაწყდა, რომ სახელმწიფო აუდიტის სამსახურში შეიქმნება პოლიტიკური დაფინანსების კანონიერებასა და გამჭვირვალობის მონიტორინგის საკითხებზე მომუშავე დროებითი კომისია, რომელიც დაკომპლექტდება არასამთავრობო ორგანიზაციების წარმომადგენლებით და უშუალოდ დააკვირდებიან პოლიტიკური პარტიების ფინანსური საქმიანობის მონიტორინგის პროცესს.
აღნიშნულ შეხვედრაში მონაწილეობა მიიღო არასამთავრობო ორგანიზაციის „ადამიანი, კანონი, თავისუფლებას" იურისტმა, ბექა გამდლიშვილმა და გაეცნო აუდიტის სამსახურის ინიციატივას.
არასამთავრობო ორგანიზაცია „ადამიანი, კანონი, თავისუფლება" მიესალმება ინიციატივას არასამთავრობოთა ჩართულობის შესახებ პოლიტიკური პარტიების დაფინანსების მონირიტორინგის პროცესში. იმედს გამოვთქვამთ, რომ შექმინილი კომისია იქნება ქმედუნარიანი და ხელს შეუწყობს პარტიების დაფინანსების გამჭვირვალობას, რაც თანაბარი კონკურენტული პირობების შექმნის ერთ-ერთი კომპონენტს წარმოადგენს.
ჩვენი ორგანიზაცია 2010 წლიდან ახორციელებს სხვადასხვა მნიშვნელოვან პროექტებს და აქტიურად არის ჩართული არჩევნებზე დაკვირვების პროცესში. 2013 წლის საპრეზიდენტო არჩევნებში ორგანიზაცია ახორციელებდა არჩევნების მიმდინარეობის პროცესზე მონიტორინგს უშუალოდ სასჯელაღსრულების დაწესებულებებში. არჩევნების მონიტორინგში ასევე ჩართული იყვნენ ორგანიზაციის ერთ-ერთი პროექტის „ახალგაზრდული თვითმმართველობების" მონაწილეები.
ზემოაღნიშნულიდან გამომდინარე, ორგანიზაციისთვის უმნიშვნელოვანეს საკითხს წარმოადგენს კომისიაში ჩართვა. ვფიქრობთ ჩვენი გამოცდილება და კომპეტენცია შეესაბამება იმ მოთხოვნილებებს, რომელიც მოეთხოვება კომისიის წევრ ორგანიზაციებს. ამასთანავე, ამ პროცესში ჩართვა მოგვცემს საშუალებას მიღებული გამოცდილება სხვადასხვა პროექტების ფარგლებში მთელი ქვეყნის მასტაბით მივაწოდოთ დაინტერესებულ საზოგადოებას.
კომისიაში ჩართვის მოთხოვნით უკვე გაგზავნილია მიმართვა და ორგანიზაციის სახელით წარდგენილია ჩვენი იურისტი, ბექა გამდლიშვილი. იმედს ვიტოვებთ, რომ აუდიტის სამსახური არ მოახდენს ჩვენი მიმართვის იგნორირებას და მოგვცემს საშუალებას გახვდეთ ამ მნიშვნელოვანი პროცესის მონაწილე.
მასალის გამოყენების პირობები