მშრალტვირთმზიდი გემი „სტელა"2013 წლის 2 ნოემბერს ჩაიძირა კუნძულ კარპატოსთან. ეკიპაჟის 6 წევრიდან 5- გადარჩა, გემის კაპიტნის, ლევან თებიძის პოვნა საძიებო-სამაშველო ოპერაციების შედეგად ვერ მოხერხდა . გემის ჩაძირვიდან 2 თვეზე მეტი ხნის განმავლობაში კაპიტანი უგზო-უკვლოდ დაკარგულად ითვლებოდა. ეკიპაჟის წევრების ინფორმაციით, კაპიტან თებიძეს კატასტროფის მომენტში გემი არ დაუტოვებია.
ლევან თებიძის საძიებო სამუშაოებში აქტიურად ჩაერთო საქართველოს ხელისუფლება. კერძოდ, საქართველოს ეკონომიკისა და მდგრადი განვითარების სამინისტროს მიერ პირველად განხორციელდა მასშტაბური წყალქვეშა საძიებო სამუშაოები - ამ მიზნით სამინისტრომ გამოყო 200 000 ათასი ლარი, დაიქირავა ბერძნული კომპანია SPANOPOULOS GROUP, რომელმაც საბერძნეთის საზღვაო ინციდენტების მოკვლევის ბიუროსგან მიღებული ინფორმაციის საფუძველზე, სპეციალური ტექნიკის (მათ შორის დისტანციური მართვის რობოტის) და ექოლოტის გამოყენებით განახორციელა საძიებო სამუშაოები გემის ჩაძირვის ადგილის მიმდებარე აკვატორიაში. სამუშაოებში ასევე აქტიურად იყო ჩართული საქართველოს საგარეო საქმეთა სამინისტრო და სსიპ „საზღვაო ტრანსპორტის სააგენტო". საძიებო სამუშაოები იმ ეტაპზე წარუმატებლად დასრულდა.

ეკონომიკისა და მდგრადი განვითარების სამინისტროს მთელი ამ ხნის განმავლობაში მუდმივი კონტაქტი ჰქონდა დაკარგული კაპიტნის ლევან თებიძის ოჯახთან.

ინფორმაცია დაკარგული კაპიტნის ცხედრის პოვნის შესახებ ქართულმა მხარემ 2014 წლის იანვარში მიიღო. კერძოდ, 9 იანვარს საბერძნეთში საქართველოს საკონსულო სამსახურში მიღებულ იქნა შეტყობინება, რომლის მიხედვითაც 2013 წლის 30 ნოემბერს კუნძულ თერას აკროტირის აპოთიკეს სანაპიროზე, გემის ჩაძირვის ადგილიდან 135 კილომეტრის დაშორებით, ადგილობრივი სანაპირო დაცვის სამსახურის მიერ ნაპოვნი იქნა მამაკაცის გვამი. თუმცა, მისი იდენტიფიცირება ვერ მოხერხდა და გადატანილი იქნა ქ. ათენის პროზექტურაში.
კუნძულ თერას სანაპირო დაცვის სამსახურის ვარაუდით, აღნიშნული ცხედარი შეიძლება ყოფილიყო „სტელას" დაკარგული კაპიტნის - ლევან თებიძის. 10 იანვარს საქართველოს საკონსულო დაუკავშირდა ათენის პროზექტურას და გაარკვია, რომ გვამის იდენტიფიცირება შესაძლებელია უახლოესი ნათესავების (ბიოლოგიური შვილები ან მშობლები) პირის ნაცხის ნიმუშის (epithelial mouth swab) მიწოდებით ან საქართველოს შესაბამის ლაბორატორიაში ჩატარებული Kit NGM Seleqt-ის ანალიზის შედეგების მიწოდებით.

აღნიშნულის შესახებ საგარეო საქმეთა სამინისტრომ აცნობა დაკარგული კაპიტნის ოჯახს. ოჯახის მიერ საბერძნეთში გაიგზავნა კაპიტნის დედის პირის ნაცხის ნიმუში, რომლის ანალიზის შედეგადაც ამოცნობილ იქნა დაკარგული კაპიტნის გვამი.

კაპიტან ლევან თებიძის ცხედარს საქართველოში 3 მარტს ჩამოასვენებენ. მისი გადმოსვენების ხარჯებს სახელმწიფო გაიღებს.