საპარლამენტო უმრავლესობის ლიდერი პავლე კუბლაშვილი "იმ პოლიტიკური ლიდერების ყიჟინას, რომელიც მათ იმიტირებული "ქრონიკის" ეთერში გასვლის შემდეგ დასცეს", "სამარცხვინოს" უწოდებს. "ძალიან სამარცხვინოა იმ პოლიტიკური ლიდერების ყიჟინა, რომელიც მათ დასცეს ამ გადაცემის შემდეგ, რადგან ესენი არიან ის ლიდერები, რომლებიც ასეთი სცენარისთვის ემზადებიან", - განუცხადა კუბლაშვილმა ჟურნალისტებს ტელეკომპანია "იმედის" ეთერში გუშინ გასულ გადაცემაზე კომენტირებისას. რაც შეეხება უშუალოდ ომის იმიტირებულ "ქრონიკას", კუბლაშვილი მას "გადაცემის მომზადების საკითხისადმი უპასუხისმგებლო დამოკიდებულებად" აფასებს. "ეს უნდა შეფასდეს, როგორც უპასუხისმგებლო დამოკიდებულება გადაცემის მომზადების საკითხისადმი. ეს არაა კონკრეტული ჟურნალისტის დანაშაული, ვფიქრობ, აქ ტელევიზიის ხემძღვანელობამ და გადაცემის მომზადებაში ჩართულმა პირებმა დაუშვეს უდიდესი შეცდომა. როცა ხდება იმის ინსცენირება, რომ საქართველოს წინააღმდეგ ხორციელდება ძალიან დიდი აგრესია, კომპეტენტურ პირებს ის მაინც არ უნდა დაავიწყდეს, რომ ელემენტარულად, ეკრანზე შესაბამისი ნიშანი გააკეთონ", - განმარტა კუბლაშვილმა. აღსანიშნავია, რომ საკანონმდებლო ორგანოში უქმე დღის მიუხედავად უმრავლესობისა და უმცირესობის წარმომადგენლები დღეს დილიდან არიან შეკრებილნი. ცოტა ხანში აღნიშნულთან დაკავშირებით განცხადების გაკეთებას გეგმავს უმრავლესობის ლიდერი პეტრე ცისკარიშვილიც.