დღეს აჭარის მთავრობის თავმჯდომარე არჩილ ხაბაძე საქართველოს ფინანსთა მინისტრის მოადგილესთან გიორგი ჯავახიშვილთან ერთად საქართველო-თურქეთის რესპუბლიკის საზღვარზე ახალი გამშვები პუნქტის „მარადიდი-მურათლის" სამუშაო ჯგუფს შეხვდა, რომელიც ბათუმში გუშინ ჩამოვიდა.
თურქული მხარის დელეგაციაში შედიან თურქეთის ვაჭრობის სამინისტროს, საგარეო ურთიერთობის სამინისტროს, შინაგან საქმეთა სამინისტროს და ეროვნული დაცვის სამინისტროს წარმომადგენლები. მათ მარადიდი-მურათლის ტერიტორიას საქართველოს ინფრასტრუქტურის და რეგიონალური განვითარების სამინისტროს, ენერგეტიკის სამინისტროს, საგარეო ურთიერთობების სამინისტროს, შემოსავლების სამსახურის და აჭარის მთავრობის წარმომადგენლებთან ერთად, მოინახულეს. სამუშაო შეხვედრა კირნათის საგუშაგოზე გაიმართა. სამუშაო ჯგუფი ბათუმში 3 დღეს დაჰყოფს. ხვალ, 23 იანვარს „შერატონ ბათუმში" გამშვები პუნქტის მშენებლობის საკითხი განიხილება.
საქართველოს მთავრობასა და თურქეთის რესპუბლიკას შორის მოლაპარაკებები ახალი სასაზღვრო გამშვები პუნქტის გახსნასთან დაკავშირებით 2011 წლის სექტემბერში დაიწყო. თურქული მხარე მზადაა გახსნას მურათლი-კირნათში სახმელეთო საზღვარი, რაც შეამცირებს ქამილის რეგიონში მგზავრობის მანძილს და ორ რეგიონს შორის მოქალაქეთა გადაადგილებას გაამარტივებს.
