თურქულ-ქართული კომპანია „TAM GEO LLC", რომელიც ბათუმში Babillon Tower-ს აშენებს, საინვესტიციო პორთფელის მოცულობას ზრდის. Babillon Tower-ის საინვესტიციო მოცულობა, რომელიც ზღვისპირა ქალაქში, რუსთაველის # 30-ში შენდება, 70 მლნ დოლარით იყო განსაზღვრული, თუმცა პროექტის მასშტაბის ზრდის ფონზე ინვესტიციის მოცულობა 80 მლნ დოლარამდე იზრდება.
კომპანია „TAM GEO LLC"-ის წარმომადგენeლის დანიელ დოინიცინის განმარტებით, კომპანიამ პროექტის განხორციელებისათვის 2013 წელს 17.5 მილიონი დოლარის ინვესტიცია უკვე განახორციელა.
როგორც ცნობილია, კომპლექსის სიმაღლე 170 მეტრი იქნება და ის 2 კოშკისგან შედგება, საიდანაც ერთი საცხოვრებელი/საოფისე/სავაჭრო ცენტრი იქნება, ხოლო მეორე კომპლექსში - 4 ვარსკვლავიანი, მსოფლიო ბრენდის ფეშენებელური, სასტუმრო განთავსდება. თუმცა კონკრეტულად, რომელი ბრენდის სასტუმრო განთავსდება Babillon Tower-ში ინვესტორ კომპანიაში ამ ეტაპისთვის ისევ არ აკონკრეტებენ.
„პირვანდელი პროექტის თანახმად, სასტუმრო 14 სართულიანი უნდა ყოფილიყო, თუმცა გეგმა შეიცვალა და სასტუმრო თავისი მიწისქვეშა ავტოსადგომიანად 17 სართულიანი იქნება. სასტუმრო 168 ნომერზე იქნება გათვლილი"- აცხადებს დანიელ დოინიცინი. სასტუმროში ნომრების ფასი კი დაახლოებით 100 დოლარიდან 120 დოლარამდე იქნება.
პროექტის თანახმად, Babillon Tower-ი 47 სართულიანი იქნება და შენობაში განთავსდება ასევე: მიწისქვეშა ავტოსადგომი, 2 სართულიანი სავაჭრო ცენტრი, ოფისები (7 სართული), ხოლო დარჩენილ ფართში საცხოვრებელი კომპლექსები განთავსდება და მომხმარებლებს ექნება სრული ის მომსახურება, რაც სასტუმროში. აღსანიშნავია, რომ საკუთარ კლიენტებს ინვესტორი ბინებს სრული რემონტით ჩააბარებს. საცხოვრებელი ფართების რეალიზაციას კომპანია მიმდინარე თვიდან დაიწყებს, სადაც 1 კვ/მ ფართის ფასი 2500 დოლარიდან დაიწყება, ასევე აღსანიშნავია რომ თითო ბინის ჭერის სიმაღლე 3 მეტრი იქნება.
„TAM GEO LLC"-ის წარმომადგენლის დანიელ დოინიცინი აცხადებს, რომ იმისდა მიხედვით თუ როგორია მომხმარებლის მოთხოვნები, კომპანია საკუთარ კლიენტებს სხვადასხვა ტიპის
ინტერიერის დიზაინს სთავაზობს.
კომპლექსში ასევე იქნება ბავშვების გასართობი მოედანი, სპა ცენტრი, ფიტნეს ცენტრი, საუნა, ღია აუზი, დახურული და ღია რესტორნები და კაფეები, ვალეტ სერვისი, ქიმწმენდა, სილამაზის სალონი და სხვა.
Babillon Tower-ში სავაჭრო ცენტრი და კვების ობიექტების გახსნა 2014 წლის ბოლომდე არის დაგეგმილი. რაც შეეხება სასტუმროს 2015 წლის ზაფხულის სეზონისათვის,მთლიანად პროექტის დასრულებას 2015 წლის ბოლოსთვისაა ნავარაუდევი.
Babillon Tower-ის არქიტექტურის კომპანია TagoArchitects-ია.
„TAM GEO LLC", რომელიც „საერთაშორისო ინვესტორების ასოციაციის" წევრია, ამიერიდან „საერთაშორისო სავაჭრო-სამრეწველო პალატის" წევრი კომპანიაც გახდა.
