18 მარტს, ფრანკფურტში, გერმანიაში საქართველოს საპატიო კონსულის კლაუს ჰიპპის ინიციატივით, ქართულ-გერმანული ეკონომიკური ფორუმი გაიმართება. საქართველოს სავაჭრო-სამრეწველო პალატის ინფორმაციით, ღონისძიების ორგანიზატორია ფრანკფურტის ქართულ-გერმანული ეკონომიკურ-კულტურული ასოციაცია, მხარდამჭერი კი - საქართველოს სავაჭრო-სამრეწველო პალატა. ფორუმი „კომერც ბანკის" საკონფერენციო დარბაზში გაიმართება.
ფორუმში მონაწილეობას მიიღებენ ჰესენის მიწის ეკონომიკისა და შინაგან საქმეთა მინისტრები, ფრანკფურტის მერი, საქართველოს ეკონომიკისა და მდგრადი განვითარების სამინისტროს, რეგიონული განვითარებისა ინფრასტრუქტურის სამინისტროს, ფინანსთა სამინისტროს, ეროვნული საინვესტიციო სააგენტოს, თანაინვესტირების ფონდისა და სხვა ორგანიზაციების წარმომადგენლები.
ფორუმის ფარგლებში გაიმართება B2B შეხვედრები ქართულ და გერმანულ კომპანიებს შორის შემდეგი სექტორებიდან: სოფლის მეურნეობა, უძრავი ქონება და მშენებლობა, ალტერნატიული ენერგია, ტურიზმი, ტრანსპორტი და ლოჯისტიკა, ბანკები და ფინანსები. ქართულ და გერმანულ კომპანიებს შორის ორმხრივი შეხვედრები წინასწარ დაიგეგმება საქმიანობის სფეროდან და ინტერესებიდან გამომდინარე.
ბიზნესფორუმში მონაწილეობის საფასურია 160 ევრო, რაც ფარავს სამჯერადი კვების, საკონფერენციო სივრცისა და თარგმნის საფასურს.
საქართველოს სავაჭრო-სამრეწველო პალატა, საჭიროების შემთხვევაში ორგანიზებას გაუწევს ბიზნეს-დელეგაციის ლოჯისტიკურ მხარეს (სავიზო საკითხებში დახმარება, ავიაბილეთების და სასტუმროს დაჯავშნა).
