15 მარტს ბრიტანეთის საბჭო, ხელოვნების საერთაშორისო ცენტრი "ისტორიალი" და ქუთაისის ნ. ბერძენიშვილის სახელობის სახელმწიფო ისტორიული მუზეუმი ქუთაისის სახელმწიფო ისტორიულ მუზეუმში აწყობს ბრიტანეთის საბჭოს "შემოქმედებითი თანამშრომლობის" პროექტის ფარგლებში შექმნილი კოლექციის პრეზენტაციას. ქუთაისის სახელმწიფო მუზეუმში იხსნება სამუზეუმო მაღაზია-სალონი.
პროექტი წარმოადგენს სამუზეუმო თემატიკაზე ხელოვნების საერთაშორისო ცენტრის მუშაობის გაგრძელებას - მცხეთის მუზეუმის (2005წ) და საქართველოს სახელმწიფო მუზეუმის (2001) კოლექციების შემდგომ, პროექტის შედეგად შეიქმნა ახალი ნიმუშები ქუთაისის სახელმწიფო მუზეუმთან, ბათუმის არქეოლოგიურ მუზეუმთან, თბილისის თოჯინების მუზეუმთან და ზაქარია ფალიაშვილის სახლ-მუზეუმთან თანამშრომლობით.
განსაკუთრებული ორიგინალობით გამოირჩევა მინიატურული ფიგურები შექმნილი ქუთაისის სახელმწიფო მუზეუმში დაცული ძვ. წ. VII-VI ს.ს. საკულტო-სარიტუალო დანიშნულების ბრინჯაოს მცირე ზომის ქანდაკებების საფუძველზე. ანტროპომორფული ფიგურები სავარაუდოდ, განკუთვნილი იყო ოჯახში სალოცავად და წარმოადგენდა ნაყოფიერების ღვთაების კერპს. ასევე პრეზენტაციაზე წარმოდგენილი იქნება დეკორატიული სასმისები _ შექმნილი სოფელ ჭოგნარში (თერჯოლის რ-ნი) აღმოჩენილი სარიტუალო-საყოფაცხოვრებო დანიშნულების თიხის ჭურჭლის მიხედვით. ძვ.წ. V ს. ფიჭვნარში (აჭარა) კოლხურ ნეკროპოლზე აღმოჩენილი ოქროს სამკაულების მხატვრული გადამუშავება.
სალონში წარმოდგენილი იქნება საქართველოს სხვადასხვა რეგიონში - აფხაზეთი, აჭარა, სამეგრელო, იმერეთი, რაჭა, სამაჩაბლო, კახეთი და სხვ. - არქეოლოგიური გათხრების დროს აღმოჩენილი ნივთების მიხედვით შექმნილი კოლექცია ხელოვნების საერთაშორისო ცენტრ "ისტორიალის" მიერ.
პროექტის დასკვნითი ღონისძიების სტუმრები არიან ბრიტანეთის საბჭოს და სომხეთის პარტნიორი მუზეუმების წარმომადგენლები.
